Sang Abril 7, 2023, si Brother Rustam Seidkuliev ginpagua sa prisuhan sa Russia. Pagkatapos sang pila ka bulan nga paghulat, gin-deport sia sa Turkmenistan sang Septiembre 17, 2023, bangod ginbawi sang gobierno sang Russia ang iya citizenship. Gusto na gid sang iya asawa nga si Yuliya nga makaupod sia liwat.

Pito ka bulan nga gin-house arrest si Rustam kag 23 ka bulan nga napriso. Sa sini nga mga tion, padayon sia nga nangin positibo kag ginpabakod niya ang iya pagtuo kay Jehova. Sa isa ka sulat nga ginsulat niya sa prisuhan, ginsugid ni Rustam kon paano nakabulig sa iya ang mga halimbawa sa Biblia nga makabatas: “Napalig-on gid ako ilabi na sang mga halimbawa ni Nabot kag ni Mefiboset. Ginpasibangdan sila bisan wala sila sang sala pero padayon sila nga nangin mainunungon kay Jehova. Nakabulig ini sa akon nga masarangan ang akon sitwasyon kag magpokus sa akon paglaum.”

Isa ka bes lang sa sulod sang tatlo ka bulan nga ginpasugtan si Yuliya nga bisitahon si Rustam samtang ara sia sa prisuhan. Pero ginpabakod nila ang isa kag isa paagi sa pagtawganay sa telepono adlaw-adlaw kag ginalakip nila ang pagbasa sang daily text kag sang komento halin sa Pag-usisa sa Kasulatan Adlaw-adlaw.

Antes sia gindala sa prisuhan, si Rustam nagsiling: “Kabalo ko nga kontrolado ni Jehova ang tanan kag handa sia nga atipanon kita sa insakto nga tion kag sa insakto nga paagi. Gani, dapat padayon ako nga magsalig gid sa iya.”

Nagasalig kita nga atipanon ni Jehova si Rustam kag si Yuliya samtang padayon nila Sia nga ginahimo nga dalangpan kag kuta.—Salmo 91:2.