Sang Disiembre 21, 2020, ang Leninskiy District Court sang Rostov-on-Don nagdesisyon nga guilty si Brother Semyon Baybak kag ginpamatbatan sia sing tatlo ka tuig kag tunga nga suspended prison sentence. Indi sia kinahanglan nga prisuhon sa sini nga tion.

Sa katapusan nga mensahe ni Semyon sa korte, pila ka adlaw antes sang desisyon, ginsambit niya ang ginsiling sang isa ka kilala nga human rights activist sa Russia: “Ginahingabot sila [ang mga Saksi ni Jehova], pero nagayuhum gihapon sila.” Ugyon gid sa sini si Semyon: “Matuod gid ina. Wala ako ginasubuan kag wala man ako nagadumot.” Dayon ginbasa niya ang 2 Corinto 4:8, 9, kag nagsiling nga amo gid ini ang nagakatabo sa iya kag sa iya mga kauturan nga Saksi sa Russia: “Ginaipit kami sa tanan nga paagi, apang indi buot silingon nga indi na gid kami makahulag; ginaligban kami, apang indi buot silingon nga wala na gid kami sing malutsan; ginahingabot kami, apang wala kami ginpabay-an; ginapukan kami, apang wala kami malaglag.”