Sa Nobiembre 24, 2020, * ipahibalo sang Petropavlovsk-Kamchatskiy City Court sang Kamchatka Territory ang desisyon sini sa kaso ni Brother Sergey Ledenyov. Mahimo sia prisuhon sing anom tuig.

Sergey Ledenyov

• Natawo: 1974 (Ossora, Kamchatka Region)

• Biograpiya: Isa sa anom ka kabataan. Mahilig sia sa photography kag pagdrowing. Nagaobra sia sa konstruksion bilang bricklayer kag manugplastar sang mga tile. Para sa iya, ang Biblia wala nagasanto sa science kag kinaraan na, pero sang ulihi natun-an niya ini upod sa mga Saksi ni Jehova. Ginpangasawa niya si Anna sang 2017. Nagsiling si Anna nga sang ginsunod ni Sergey ang mga prinsipio sa Biblia, nangin kalmado sia kag mapinalanggaon nga bana

Sang Disiembre 2, 2018, gin-raid sang isa ka grupo sang armado nga mga pulis nga may tabon ang guya ang balay ni Brother Ledenyov sa Petropavlovsk-Kamchatskiy. Ginpriso sia kag ginkasuhan sang krimen base sa Article 282.2 sang Russian Criminal Code. Ang pagbista sa iya kaso ginsugdan sang Nobiembre 28, 2019.

Sang Disiembre 12, 2019, ginbalik sang Petropavlovsk-Kamchatskiy City Court sang Kamchatka Territory ang kaso sa piskal. Amo sina pirme ang nagakatabo kon makita sang korte nga may problema sa akusasyon, pareho sang kulang nga ebidensia. Pero sang Pebrero 4, 2020, ginbag-o sang higher court ang desisyon kag ginpadayon ang pagbista. Pagkatapos sini, sa isa ka hearing, gin-interogar sang mga awtoridad ang asawa ni Brother Ledenyov kag ang isa pa ka sister kag ginpuersa sila nga magtestigo sing kabutigan kontra kay Brother Ledenyov. Pero wala magtuman si Sister Ledenyov kag ang isa pa ka sister.

Indi maintiendihan sang indi Saksi nga mga paryente ni Brother Ledenyov kon ngaa ginahingabot sia bangod sa iya pagtuo.

Ginapangamuyo gid naton si Brother Ledenyov kag si Sister Ledenyov samtang ginahulat nila ang desisyon sa sini nga kaso. Nagasalig kita nga ang espiritu ni Jehova ara sa ila.—1 Pedro 4:14.