Sang Nobiembre 30, 2022, si Brother Sergey Polyakov ginpagua sa prisuhan pagkatapos sang iya tatlo ka tuig nga sentensia. Halin sang gin-aresto sia sang Hulyo 4, 2018, naagyan niya ang sarisari nga porma sang pag-detain, lakip ang lima ka bulan sa bartolina.

Sa katapusan nga 16 ka bulan nga pagkapriso ni Sergey, ara sia sa penal colony sa siudad sang Velday, nga mga 3,000 ka kilometro halin sa iya balay. Nakilala sia bilang priso nga may daku nga pagtuo kag ginarespeto sia sang mga staff sang prisuhan kag sang kaupod niya nga mga priso. Sang ara sia sa prisuhan, napalig-on si Sergey sang madamo nga mga sulat nga iya nabaton halin sa iya mga abyan kag paryente. Pirme sia makabaton sang mas madamo nga sulat sa isa ka adlaw sangsa mabaton sang mga 250 ka tawo sa bilog nga colony.

Sang nakagua na si Sergey, nakaupod na niya liwat ang iya asawa nga si Anastasia. Ginbartolina man si Anastasia sing lima ka bulan. Sang ulihi, gindesisyunan man nga guilty si Anastasia kag ginsentensiahan sing suspended prison bangod sang iya pagtuo. Ang mag-asawa nga Palyakov amo ang una nga mag-asawa nga napriso pagkatapos magdesisyon ang Supreme Court sang 2017 nga gina-ban na ang hilikuton sang mga Saksi ni Jehova.

Sobra 100 ka kauturan ang ara sa prisuhan sa Russia kag Crimea. Nagasalig kita nga padayon nga buligan ni Jehova ang mga ‘nagabatas sang kabudlayan kag nagaantos sing indi makatarunganon bangod sang pagtuman sa Dios.’—1 Pedro 2:19.