Sang Septiembre 2, 2019, ginsentensiahan sang Zheleznodorozhniy District Court sang Khabarovsk, Russia, si Brother Valeriy Moskalenko sing duha ka tuig kag duha ka bulan nga pagserbisyo sa komunidad kag sing anom ka bulan nga probation. Indi na sia kinahanglan nga prisuhon liwat.

Pagkatapos mabasa ang desisyon, ginbuy-an dayon si Brother Moskalenko, kag nalipay gid ang iya pamilya kag mga abyan. Ginpriso sia sugod sang Agosto 2, 2018. Antes sia gin-aresto, nagaobra sia bilang assistant nga konduktor sang tren kag ginaatipan pa niya ang iya iloy nga nagamasakit. Bangod ginpaidalom sia sa probation, indi sia makagua sa Khabarovsk kag dapat sia magreport sa mga pulis kada bulan para makita nila nga wala sia sing ilegal nga ginahimo.

Sa iya katapusan nga mensahe sa korte sang Agosto 30, si Brother Moskalenko nagsiling: “Indi ko gid mahimo nga supakon ang kabubut-on sang Dios nga maathag nga ginatudlo sang Biblia. Kag bisan ano pa nga pressure ukon silot ang ihatag sa akon, bisan sentensiahan pa ako sing kamatayon, ginapahibalo ko nga indi ko gid pagtalikdan ang labing gamhanan nga Manunuga sang uniberso, si Jehova nga Dios.”

Si Yaroslav Sivulskiy, nga isa ka representante halin sa European Association of Jehovah’s Witnesses, nagsiling: “Bisan pa wala kami nagaugyon sa sini nga desisyon nga guilty sia, nalipay kami nga makapauli na si Valeriy.”

Magluwas kay Brother Moskalenko, may pito pa ka brother sa Khabarovsk Territory nga nagahulat sang desisyon sa mga kaso kriminal batok sa ila.

Nagapasalamat gid kita kay Jehova nga padayon nga nangin mabakod ang pagtuo ni Brother Moskalenko sang ara pa sia sa prisuhan. Ginapangamuyo naton nga padayon Sia nga magaaman sing kabakod sa tanan naton nga kauturan nga nagabatas sing paghingabot bangod sa ila base sa Biblia nga mga pagpati.—Isaias 40:31.