Sang Hulyo 23, 2021, gin-deny sang Novosibirsk Regional Court ang pag-apelar ni Vitaliy kag ginsuportahan sini ang sentensia sa iya nga tatlo ka tuig nga suspended prison.

Sang Mayo 21, 2021, nagdesisyon ang Leninskiy District Court of Novosibirsk nga guilty si Brother Vitaliy Popov. Ginsentensiahan sia sing tatlo ka tuig nga suspended prison.

Vitaliy Popov

• Natawo: 1967 (Novosibirsk)

• Biograpiya: Isa sia ka elektrisyan kag welder. Isa man sia anay ka soldado sa Soviet. Nanamian sia mag-ski, mag-soccer, mag-volleyball, kag magkanta. May duha sia ka utod nga lalaki kag duha ka utod nga babayi. Sang medyo adulto na si Vitaliy, napatay ang iya magulang nga lalaki kag babayi. Bangod sini, madamo sia sing pamangkot parte sa kamatayon kag sa palaabuton

  Sang mga dekada ’90, nagtuon sia sing Biblia upod sa mga Saksi ni Jehova. Nasabat gid ang iya pamangkot kon ngaa nagakapatay ang mga tawo. Natandog man sia sa gugma, pagrespeto, kag pagbuligay sang mga Saksi. Nabawtismuhan sia sang 1994. Napangasawa niya si Natalya sang 2011

Sang Hunyo 27, 2019, ginpasakaan sang mga awtoridad sing kaso kriminal si Vitaliy. Sang Abril 9, 2020, gin-raid sang mga pulis ang iya balay kag gin-aresto sia para sa imbestigasyon. Gin-interogar sia sing sobra apat ka oras.

Ginbutang sa listahan sang mga extremist ang ngalan ni Vitaliy. Bangod sini, gin-freeze ang iya bank account. Pagligad sing duha ka bulan, napilitan si Vitaliy nga mag-resign sa iya obra. Bangod sini namigado gid ang ila pamilya.

Padayon nga ginbuligan ni Jehova ang pamilya ni Vitaliy. “Ginbuligan gid kami ni Jehova nga padayon nga mangin suod sa iya, gin-amanan niya kami sa materyal, kag ginpalig-on gid niya kami,” siling ni Vitaliy. “Nagapasalamat gid ang amon pamilya sa bulig ni Jehova. Nakabulig ini sa amon nga mabatas ang amon sitwasyon kag mangin positibo pirme.”

Ginsugid ni Vitaliy kon ano gid ang nakabulig sa iya nga mabatas ini nga sitwasyon: “Ang akon regular nga mga iskedyul sa pagsimba kay Jehova nakabulig gid sa akon nga mangin suod pa gid sa iya. Mas nabatyagan ko pa gid nga ara gid si Jehova. Natun-an ko nga bisan ano man ang matabo dapat ako magsalig sa iya.” Nalakip sa regular nga pagsimba ni Vitaliy amo ang family worship, pag-attend kag pagkomento sa mga miting sa kongregasyon, regular nga pagpakigbahin sa ministeryo, kag ang pagsugid sang tanan niya nga ginabatyag paagi sa pangamuyo. Nagsiling sia: “Kon wala ko ini ginhimo, sigurado gid nga indi ako magsalig kay Jehova kag indi ko gid masarangan ini nga kabudlayan.”

Samtang ginahulat naton ang desisyon sa kaso ni Vitaliy, kabay nga padayon naton sia nga ipangamuyo. Kabalo kita nga si Jehova, ‘ang isa nga nagapabakod sa aton,’ padayon nag magapabakod sang aton mga kauturan sa Russia nga maisog nga nagabatas sang paghingabot.—Filipos 4:13.