Sa Hulyo 14, 2020, posible nga ipahibalo sang Furmanovsky City Court sang Ivanovo Region ang desisyon sini sa kaso ni Brother Yevgeniy Spirin. Gusto sang piskal nga prisuhon sing pito ka tuig si Brother Spirin.

Si Brother Spirin, nga 34 anyos, ginkasuhan nga nagaorganisar sang mga hilikuton sang “extremist” nga organisasyon. Ginkasuhan sia sang Enero 21, 2019, sang isa ka imbestigador sang Federal Security Service (FSB). Pagligad sang anom ka adlaw, gin-raid sang mga FSB agent ang balay ni Brother Spirin kag sang iya asawa nga si Natalya. Ang Oktyabrsky District Court sang Ivanovo Region nagmando nga prisuhon si Brother Spirin sing indi magnubo duha ka bulan bisan wala pa sia mabista, bangod lamang isa sia sa mga Saksi ni Jehova. Pagligad sang duha ka bulan, wala sia gihapon ginpagua.

Ginpagua lang sia sang Hulyo 5, 2019, pagkatapos sang 160 ka adlaw, dayon gin-house arrest sia. Sang Disiembre 18, 2019, nagmando ang Oktyabrsky District Court sang Ivanovo Region nga tapuson na ang pag-house arrest kay Brother Spirin bisan pa indi ini gusto sang mga imbestigador. Wala naman sang iban nga pagdumili nga ginpatuman sa iya.

Nagapangamuyo kita kag nagasalig nga padayon nga buligan sang aton mahigugmaon nga Amay sa langit nga si Jehova ang aton mga kauturan sa Russia nga ginahingabot bangod sang ila pagtuo.—1 Pedro 4:14.