Sang Hulyo 19, 2021, ang Solombalskiy District Court of Arkhangelsk nagdesisyon nga guilty si Brother Yevgeniy Yakku kag ginmultahan sia sing 880,000 rubles ($12,082 U.S.). Indi niya kinahanglan nga mapriso.

Yevgeniy Yakku

• Natawo: 1980 (Sosnovets Village, Republic of Karelia)

• Biograpiya: Sang tin-edyer sia, nagdayaw gid sia sa nagakatuman nga mga tagna sa Biblia. Nabawtismuhan sia bilang isa sa mga Saksi ni Jehova sang 2006. Nagsaylo sia sa Arkhangelsk para mag-eskwela sa isa ka business school. Napangasawa niya si Irina sang 2007. Nanamian sila magbiyahe kag maglagawlagaw sa gua

Sang aga sang Pebrero 18, 2019, gin-raid sang mga awtoridad sang Russia ang balay ni Brother Yevgeniy Yakku kag gin-aresto sia bangod nagahimo sia kuno sing mga hilikuton sang isa ka “extremist.” Gindala sang mga pulis si Yevgeniy kag gin-detain sia sing duha ka adlaw. Wala man ginpahibalo ang iya mga abyan kag pamilya nga ginpriso sia.

Sang makagua sia, gindumilian sia nga maggua sa iya balay kon gab-i, maghiwat sing bisan ano nga pagtinipon sa ila balay, kag mag-istorya sang iya kaso sa iban nga nadalahig sa sini bisan paagi man sa pagtawag, sa email, ukon sa Internet. Pagligad sang mga pito ka bulan, ginbuhinan sang korte ang mga pagdumili sa iya kag puede na sia makagua sa ila balay kon gab-i.

Sang Nobiembre 25, 2019, si Yevgeniy ginpasakaan sing kaso nga pag-organisar sang “extremist” nga mga hilikuton. Sang ulihi, gindugangan pa gid ang iya mga kaso. Kon magdesisyon ang korte nga guilty sia, mahimo sia mapriso sing asta sa 15 ka tuig. Bangod sa iya mga kaso, nadulaan sing obra si Yevgeniy, indi man niya makuha ang iya kuarta sa banko, kag ginkumpiskar ang iya duha ka salakyan.

Sa sining tion sang kabudlayan, mas nga nagbakod ang pagsalig ni Yevgeniy kag ni Irina kay Jehova. Si Irina nagsiling: “Nakita ko kon paano isaisa nga ginasabat ni Jehova ang akon mga pangamuyo kag kon paano niya kami ginaatipan ni Zhenya [Yevgeniy]. Grabe gid ang akon pagpasalamat kag pamatyag ko kulang ang mga tinaga para mapabutyag ko ini .”

Halimbawa, ginsambit gid ni Irina sa iya pangamuyo kay Jehova nga buligan ang iya bana nga indi pagkulbaan kag mapaathag sing maayo ang pagpati sini sa tion sang mga hearing. Amo man sina ang ginpangamuyo ni Yevgeniy. Si Yevgeniy nagsiling: “Sa kada mag-atubang ako sa investigative committee ukon sa hearing, nagapangayo ako sing kaalam kay Jehova.” Nabatyagan gid niya nga ginasabat ni Jehova ang iya mga pangamuyo. “Kay mahambal ko ang kinahanglan ko lang ihambal.” Nagsiling pa sia: “Ginpabatyag sa akon ni Jehova nga wala gid niya ako ginpabay-an kag maathag gid ang iya sabat sa akon mga pangamuyo. Subong, mas nakita ko pa gid kon paano niya ako ginabuligan.”

Samtang ginahulat naton ang desisyon sang korte, bal-an ta nga padayon nga hatagan ni Jehova si Yevgeniy sing kaisog nga madepensahan ang iya pagtuo “nga may kalulo kag tudok nga pagtahod.”—1 Pedro 3:15.