Sang Hulyo 19, 2023, si Brother Yuriy Savelyev ginpagua sa isa ka prisuhan sa Russia sa siudad sang Rubtsovsk. Gin-detain sia sa una nga tion sang Nobiembre 9, 2018, kag napriso sia sa sobra apat ka tuig kag tunga.

Samtang ara si Yuriy sa prisuhan, nagmasakit sia bangod mahigko ang palibot. Dugang pa, pila ka beses sia nga ginbutang sa selda nga mas mabudlay ang sitwasyon bilang silot sa indi matuod nga mga akusasyon sa iya. Bisan sa sini nga mga kabudlayan, positibo gihapon si Yuriy bangod napabakod sia sang pagpangamuyo. Mabuot si Yuriy kag ginapakita gid niya ang Cristianong mga kinaiya gani ginrespeto sia sang madamo nga kaupod niya nga priso kag sang mga guardia.

Antes sia masentensiahan nga mapriso, naghambal sia sa korte, kag ginbasa niya ang Mateo 22:37, diin si Jesus nagsiling: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” Maayo gid nga halimbawa si Yuriy sa pagsunod sini nga sugo paagi sa pagpabilin nga matutom kay Jehova. Nagasalig kita nga padayon sia nga pakamaayuhon ni Jehova bangod sa iya pagtuo, gugma, kag pagbatas.