Sang Disiembre 16, 2020, * ipahibalo sang Leninskiy District Court sang Novosibirsk ang desisyon sini sa kaso ni Brother Yuriy Savelyev. Gusto sang piskal nga pamatbatan si Yuriy sing walo ka tuig nga pagkapriso. Kon matabo, amo ini ang pinakamalawig nga sentensia sa isa sa aton mga kauturan sa Russia sugod sang gin-ban sang Supreme Court ang mga Saksi ni Jehova sang 2017.

Yuriy Savelyev

• Natawo: 1954 (Krokhalyovka, Novosibirsk Region)

• Biograpiya: Napatay ang iya nanay sang lapsag pa sia. Ginpadaku sia sang iya utod nga babayi. Nag-obra sia bilang plumber sa isa ka energy plant. Nangin interesado sia sa relihion sang napatay ang iya asawa. Nakita niya sa Biblia ang maathag nga sabat sa iya mga pamangkot. Nabawtismuhan sia bilang isa sa mga Saksi ni Jehova sang 1996

Sang Nobiembre 8, 2018, gin-raid sang mga pulis ang iya apartment kag ang siam pa ka balay sang mga Saksi sa Novosibirsk Region. Gin-aresto si Yuriy kag ginbutang sa pretrial detention.

Ginkasuhan si Yuriy nga nagaorganisar sang hilikuton sang mga Saksi ni Jehova sa siudad. Siam ka beses na nga ginpalawig ang iya pagtener sa pretrial detention bisan madamo na nga appeal ang ginpasaka para makagua sia. Sobra duha ka tuig na sia sa pretrial detention. Sugod sang nagdesisyon ang Supreme Court sang Russia sang 2017, si Brother Dennis Christensen kag si Brother Sergey Klimov lang ang napriso sing mas malawig sangsa kay Brother Savelyev.

Sang ginhatag niya ang iya katapusan nga mensahe sa korte sang Mierkoles, Disiembre 9, 2020, si Yuriy maisog nga nagsiling sa judge: “Sa sini nga pagbista, wala ako gin-akusar sang bisan ano nga krimen, kundi gin-akusar ako bangod nagasunod ako sa ginatudlo sang mga Saksi ni Jehova.

“Wala ako sing kontra, kag sa akon halos 67 anyos nga pagkabuhi, wala gid sing bisan ano nga krimen nga ginpasaka batok sa akon. Nagdesisyon ako nga mangin neutral sa pulitika. Buot silingon, batok ako sa bisan ano nga pagpamintas, sa hambal man, sa hunahuna, ukon sa pisikal.

“Bangod ginatuman ko ang Dios, ginarespeto ko ang tanan nga tawo, bisan ano man ang kahimtangan sang ila pangabuhi, nasyonalidad, ukon relihion.

“Ginatudluan man kita sang Pulong sang Dios nga respetuhon ang mga awtoridad. Ang una nga bahin sang Roma 13:1-3, nagasiling: ‘Ang tagsa ka tawo dapat magpasakop sa mas mataas nga mga awtoridad, kay wala sing awtoridad nga indi halin sa Dios; ginbutang sang Dios ang mga awtoridad sa ila nagkalainlain nga palangakuan. Gani, ang tawo nga nagapamatok sa awtoridad nagapamatok sa kahimusan sang Dios.’

“Wala ako nagapamatok sa awtoridad kay indi ko gusto nga magpamatok sa Dios. Ang pagpamatok sa Dios nagaresulta pirme sa kamatayon. Sa bulig lamang sang mga Saksi ni Jehova nga nakilala ko ang isa ka matuod nga Dios, kag ang iya Anak nga si Jesucristo. Bangod sa ila, nakumbinsi man ako nga ang Balaan nga Kasulatan, ang Biblia, isa ka espesyal nga libro. Makabulig gid ini sa tanan nga bahin sang aton kabuhi.”

Makapalig-on mahibaluan nga mabakod ang pagtuo ni Yuriy kag makita sa iya pangguyahon nga ginahatagan sia ni Jehova sing dayon nga paghidait.—Isaias 26:3.