Sa Oktubre 7, 2020, * ipahibalo sang Mayskiy District Court sang Kabardino-Balkarian Republic ang desisyon sini sa kaso ni Brother Yuriy Zalipayev. Mahimo sia prisuhon sing duha ka tuig.

Yuriy Zalipayev

• Natawo: 1962 (Samara)

• Biograpiya: Nag-obra sia bilang welder kag bilang drayber sang trak. Mahilig sia sa mga binalaybay kag nanamian mag-hike

• Sang 1983 ginpangasawa niya si Natalia, nga klasmeyt niya sang bata pa sia. Pagligad sang pulo ka tuig, nagtuon sila nga mag-asawa sa Biblia. May tatlo sila ka bata. Ang ila bilog nga pamilya kag ang iban nila nga paryente nagaalagad kay Jehova

Sang Agosto 20, 2016, gin-raid sang mga pulis ang Kingdom Hall sa Mayskiy kag ginbutangan nila ini sang pila naton ka literatura nga gindumilian sang gobierno bangod ginakabig ini nga “extremist.” Bisan pa may video ang mga kauturan nga nagapamatuod nga planted ini nga mga literatura, ginmultahan sang korte sing 200,000 rubles ($2,634 U.S.) ang lokal nga relihioso nga organisasyon kay suno sa korte ginlapas sang mga kauturan ang kasuguan. Pila ka bulan sang ulihi, ginpasakaan sing kaso si Brother Zalipayev base sa sini nga insidente.

Suno sa mga nagasumbong sa iya, nagpanagtag si Brother Zalipayev sang gindumilian nga mga literatura kag ginasulsulan niya kuno ang iban nga mga Saksi ni Jehova nga sakiton ukon halitan ang mga miembro sang iban nga relihion. Ini nga mga panumbungon nabase sa kaso nga “pagpalig-on sa iban nga mag-entra sa hilikuton sang mga extremist” (Bahin 1 sang Article 280 sang Criminal Code sang Russia).

Ang pagbista sa sini nga kaso ginsugdan sang Hunyo 21, 2020. Sa sini nga mga bista, pirme nagakatabo nga ang ginahambal sang mga nagasaksi para sa mga nagasumbong wala nagasantuanay kag wala sing basihan. Halimbawa, sa sini nga mga bista, nakita nga ang mga nagsiling nga nabatian nila si Brother Zalipayev nga nagasulsol sa iban nga magpanakit ukon manghalit wala gani makatambong sa sina nga mga miting diin ginasiling nila nga natabo ini. Dugang pa, ang iban sa mga saksi nga gingamit sang mga nagasumbong amo mismo ang nagtestigo nga ang gindumilian nga mga literatura nga nakita sa Kingdom Hall, ginbutang lang didto ukon planted lang sang mga awtoridad.

Samtang ginahulat ni Brother Zalipayev ang desisyon sa iya kaso, nagapangamuyo kita nga sia kag ang iya pamilya makatigayon sing kusog kag kalinong sa ginsiling ni David: “Si Jehova amo ang akon kusog kag ang akon taming; nagasalig ako sa iya. Ginbuligan niya ako, kag nagakalipay gid ako.”—Salmo 28:7.