Sang Hulyo 20, 2021, nagdesisyon ang Moscow Regional Court nga ipatuman ang suspended prison sentence para kanday Yuriy, Zinaida, Vitaliy, kag Konstantin. Sang Mayo 24, 2021, nagdesisyon ang

Chekhov City Court of the Moscow Region nga guilty si Yuriy, si Zinaida, si Vitaliy, kag si Konstantin. Ginsentensiahan sing anom ka tuig nga suspended prison sentence si Yuriy. Sanday Zinaida, Vitaliy, kag Konstantin ginsentensiahan sing duha ka tuig nga suspended sentence ang kada isa.

Yuriy Krutyakov

• Natawo: 1952 (Nizhny Novgorod)

• Biograpiya: Isa sia ka industrial kag civil engineer. Nag-obra sia bilang draftsman kag foreman. Madugay niya nga ginpangita ang rason kon ngaa nagakabuhi ang mga tawo. Nakita niya ang sabat sang nagtuon sia sing Biblia upod sa mga Saksi ni Jehova. Ginbawtismuhan sia sang 1998

  Napangasawa niya si Zinaida sang 2012. Mahilig sila magluto kag magpamati sa music

Zinaida Krutyakova

• Natawo: 1958 (Nizhnedevitsk)

• Biograpiya: Isa sia ka nagasolo nga ginikanan kag ginpadaku niya ang iya bata nga babayi. Nag-obra sia bilang process engineer, kag sagad sia maghimo sang mga ceramic kag sang indi masunog nga mga kagamitan. Retirado na sia subong

  Nagalalain gid sia bangod sa inhustisya nga nagakatabo sa kalibutan. Nakita niya ang maathag nga mga sabat sa iya mga pamangkot sang nagtuon sia sing Biblia upod sa mga Saksi ni Jehova. Nabawtismuhan sia sang 2003. Napamana niya si Yuriy sang 2012

Vitaliy Nikiforov

• Natawo: 1968 (Nevel, Pskov Region)

• Biograpiya: Sang bata sia, maalam sia sa math kag mahilig sa sports. Nagtrabaho sia bilang aircraft technician sa Russian Air Force

  Nagtuon sia sing Biblia upod sa mga Saksi ni Jehova sang 2005. Nagretiro sia sa army sang 2007. Nabawtismuhan sia sang 2012

Konstantin Zherebtsov

• Natawo: 1973 (Turkmenistan)

• Biograpiya: Sang pamatan-on sia, nagaentra sia sa weight lifting kag mahilig sia mag-collect sang mga stamp. Naggradweyt sia sa isa ka technical school kag nag-obra bilang elektrisyan. Sugod sang 2003, nag-obra sia sa isa ka planta nga nagapanghimo sing mga makina kag ang pirme ginapahimo sa ila amo ang mga nuclear power station

  Napangasawa niya si Natalya sang 1994. Dungan sila nga nagtuon sing Biblia upod sa mga Saksi ni Jehova. Nabawtismuhan sia sang 2016

Sang Septiembre 30, 2019, ginpasakaan sing kaso kriminal sang Investigative Committee of Russia sa rehiyon sang Moscow sanday Brother Vitaliy Nikiforov, Brother Konstantin Zherebtsov, kag Brother Yuriy Krutyakov upod ang iya asawa nga si Sister Zinaida Krutyakova. Pagligad sang duha ka adlaw, gin-raid sang mga awtoridad ang ila mga balay.

Sanday Vitaliy, Konstantin, kag Zinaida pila ka oras nga gin-interogar kag ginpriso sing isa  ka gab-i. Dayon, gin-house arrest sila.

Sang Marso 5, 2020, ginbutang si Yuriy sa pretrial detention center. Tatlo ka beses na sia nga ginsaylosaylo sa sarisari nga mga detention center. Wala gihapon sia makagua asta subong.

Nagsiling si Konstantin nga daku gid ang nabulig sa iya sang pangamuyo sa sining malawig nga pag-hearing sa ila. Sang gin-raid sila, nagpangamuyo sia kay Jehova nga buligan sia nga indi magkabalaka sing sobra. Nagsiling sia: “Bangod kalmado lang kami kag may respeto sa mga awtoridad, nakapanaksi kami sang akon pamilya. Nakita sang mga awtoridad nga ang katawhan sang Dios mahidaiton kag nagatuman sa kasuguan.”

Nagsiling pa gid sia: “Sa mga tion nga ginabudlayan ako, ang Zacarias 2:8 nagpalig-on kag nagpabakod gid sa akon. Nagpahanumdom ini sa akon nga palangga ako ni Jehova kag importante ako sa iya. Ginapasalig niya ako nga proteksionan niya ako pareho sa tawotawo sang iya mata.”

Padayon nga ginatugyan sining aton tatlo ka pinalangga nga mga brother kag isa ka sister ang ila lulan kay Jehova. Sigurado kita nga padayon gid niya sila nga alay-ayon.—Salmo 55:22.