Sang Huebes, Mayo 16, 2019, ginpadayon ang nakaiskedyul nga pagbista sa appeal ni Dennis Christensen. Ang mga abogado sang piskal kag ang mga abogado sang depensa naghatag sang ila katapusan nga mga argumento, kag halos isa ka oras nga naghambal si Dennis para pangapinan ang iya pagpati. Gintambungan ini gihapon sang mga diplomat kag mga journalist halin sa iban nga pungsod. Ginapakita sini nga bisan duha ka tuig na sugod sang ginbalita sa bilog nga kalibutan ang pag-aresto kay Dennis, ang kalibutan interesado gid parte sa iya kaso.

Sang primero, ang pagbista nakaiskedyul nga magalawig asta sa Biernes, Mayo 17. Pero ginpahibalo sang mga hukom nga padayunon ini sa Huebes, Mayo 23, sa alas 10 sang aga. Si Dennis hatagan sang katapusan nga kahigayunan nga mag-appeal sa korte antes magdesisyon ang mga hukom. Indi pa mahibaluan kon bala ang desisyon ipahibalo pagkatapos sang bista sa Mayo 23, ukon kon bala ang korte magaiskedyul sang iban nga petsa para sa sini.

Nagabakod man kita kon makita naton ang aton kauturan, pareho ni Dennis Christensen kag ni Sergey Skrynnikov, nga padayon nga positibo kag nagapahayag sang ila sinsero nga handum nga magpabilin nga matutom. Ang aton ginabatyag sa pareho naton nga mga Saksi sa Russia, pareho man sa ginbatyag ni apostol Pablo sa mga taga-Tesalonica sang nagsulat sia: “Ginapabugal namon kamo sa mga kongregasyon sang Dios bangod sang inyo pagbatas kag pagtuo bisan pa sang mga paghingabot kag mga kabudlayan nga inyo ginaantos.”—2 Tesalonica 1:4.