Subong nga adlaw, tatlo ka tuig na nga ginabatas ni Brother Dennis Christensen ang indi makatarunganon nga pagpriso sa iya sa Russia. Sugod sang gin-aresto sia sang Mayo 25, 2017, madamo nga abyan ang nagpamangkot kay Brother Christensen kon ano ang epekto sini nga kabudlayan sa iya pagtuo. Amo lang gihapon ang iya sabat: “Nangin mas mabakod pa gid ang akon pagtuo.”

Si Brother Christensen nagsiling: “Naeksperiensiahan ko ang nasulat sa Biblia sa libro sang Santiago kapitulo 1, bersikulo 2 kag 3: ‘Mga kauturan ko, magkalipay kamo kon nagaatubang kamo sang nanuhaytuhay nga pagtilaw, kay nakahibalo kamo nga ang inyo pagtuo nga natilawan sa sini nga paagi nagaresulta sang pagbatas.’”

Dalayawon gid nga bisan sa mga kabudlayan kag kapaslawan nga naagyan ni Brother Christensen, padayon nga nagabakod ang iya pagtuo kag wala nadula ang iya kalipay.

Sang gin-aresto si Brother Christensen, gilayon sia nga ginpriso sa isa ka prisuhan nga lapit sa ila balay sa Oryol bisan wala pa sia mabista. Sang ulihi, ang iya asawa nga si Irina ginpasugtan nga bisitahon sia. Sobra duha ka tuig sia sa sini nga prisuhan bisan wala pa sia nasentensiahan. Sang Pebrero 2019, ginsentensiahan si Brother Christensen nga mapriso sing anom ka tuig. Pagligad sang tatlo ka bulan, ginbasura ang iya appeal. Dayon ginsaylo sia sa isa ka prisuhan nga mga 200 kilometros ang kalayuon sa Oryol, gani mas naglayuay na gid sila ni Irina.

Halos isa ka tuig na nga nangin kalipikado si Brother Christensen sa pagpangabay nga makagua sing temprano sa prisuhan. Pero tatlo sa iya apat ka aplikasyon ang ginbasura. Bisan pa sini nga mga kapaslawan, nagapabilin si Brother Christensen nga matutom.

Si Brother Christensen mapainubuson nga nagsiling: “Indi kami perpekto ni Irina, pero natun-an namon nga magbatas kag magpabilin nga malipayon bisan pa may pagtilaw. Kag ang importante sa tanan, nangin mas malapit kami sa amon Dios kag Amay nga si Jehova.”

Nagapangamuyo kita kag nagasalig nga padayon nga buligan ni Jehova ang tanan naton nga pinalangga nga kauturan sa Russia para padayon nila nga mabatas sing malipayon ang paghingabot.—Mateo 5:11, 12.