MAYO 18, 2022
RUSSIA

Si Inver Siyukhov Nangin Mabakod

I-PLAY

Sa indi madugay, ipahibalo sang Maykopskiy City Court of the Republic of Adygeya ang desisyon sini sa kaso ni Brother Inver Siyukhov. Wala pa sing may ginsiling ang piskal kon ano nga sentensia ang gusto niya sa sini nga kaso.

Time Line

Abril 15, 2021

Ginkasuhan sia bangod sa paghiwat sang mga miting paagi sa videoconference
Abril 16, 2021

Gin-raid sang mga awtoridad ang balay ni Inver kag ang balay sang apat pa ka mga Saksi ni Jehova. Gin-interogar sia kag ginbutang sa temporary detention
Abril 17, 2021

Ginbutang sia sa pretrial detention
Agosto 15, 2021

Ginsaylo sia sa isa ka maximum-security detention center nga mga 110 ka kilometro halin sa Maykop
Septiembre 13, 2021

Ginsugdan ang hearing

Impormasyon Parte sa Iya

Inver Siyukhov

Natawo:1974 (Maykop)

Biograpiya: Nakaeskwela sia sa accounting kag auditing. Nag-obra sia bilang cashier sa banko kag accountant

Nagtuon sia upod sa mga Saksi ni Jehova sang 1989. Nagdayaw sia kay honest sila. Nabawtismuhan sia sang Septiembre 9, 1990. Ginsugid niya ang kamatuoran sa iya manghod nga babayi, nga nabawtismuhan sang 1992. Ang iya manghod nga babayi kag ang bana sini amo lang ang iya mga paryente nga Saksi

Ang Ginsiling sang Iya Manghod nga Babayi nga si Zarieta Churda a

Ano ang nakabulig kay Inver nga mabatas ang pagkapriso?

Sa una nga tion nga nakaistoryahanay kami sa detention center, ginpamangkot ko sia kon ano ang iya ginabatyag kay napahilayo sia sa iya mga abyan kag pamilya. Eksayted sia nga nagsiling nga sa pagsugod pa lang sang raid, nabatyagan niya nga ginpabakod sia ni Jehova, pareho sang balloon nga ginpuno sang hangin.

Dugang pa, padayon sia nga nagabasa kag nagatuon sa Pulong sang Dios. Nagabasa sia sang tatlo ka kapitulo sa Hebreong Kasulatan kag isa ka kapitulo sa Griegong Kasulatan kada adlaw. Ginabuligan man niya ang pareho niya nga mga priso sa praktikal nga paagi. Sa una nga duha ka bulan, nabuligan niya ang duha ka priso nga mag-untat sa pagpanigarilyo.

Ano nga paghanda ang ginahimo ninyo sang imo bana, kay posible man kamo arestuhon?

Kon magbiyahe ang mga turista sa iban nga pungsod, nagapabakuna sila bilang paghanda sa mga balatian. Ang akon “bakuna” amo ang mga bersikulo sa Biblia, ang aton mga ambahanon, kag ang makapalig-on nga mga eksperiensia. Sang gin-ban sang Russia ang mga Saksi ni Jehova sang 2017, ginbasa ko liwat ang mga report sa Yearbook kon paano ginahimo ang pagbantala sa mga pungsod nga gin-ban ang aton hilikuton. Interesado gid ako nga mahibaluan kon paano ginapabakod sang aton mga kauturan ang ila pagtuo kag makapadayon sa pagbantala bisan pa may katalagman.

Nagdesisyon kami nga kon arestuhon kami, indi namon pagkaluoyan ang amon kaugalingon. Para sa amon, isa ini ka mabudlay pero manami nga asaynment. Daw pareho lang nga nagsiling sa amon si Jehova: ‘Tabok kamo diri sa Macedonia.’—Binuhatan 16:9.

Nagasalig kita nga ang aton palangga nga mga kauturan sa Russia ‘padayon nga magbakod paagi sa Ginuo kag sa gahom sang iya kusog.’—Efeso 6:10.

a Bangod ara sa pretrial detention subong si Brother Siyukhov, indi sia puede interbyuhon.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE