SEPTIEMBRE 12, 2023
RUSSIA

“Si Jehova Pirme Gid Nagabulig!”

I-PLAY

Sang Agosto 18, 2023, ginsentensiahan nga guilty sang Solikamsk City Court of the Perm Territory sanday Brother Vladimir Poltoradnev, Brother Aleksandr Sobyanin, kag Brother Vladimir Timoshkin. Ginmultahan si Brother Poltoradnev sang 638,000 ka ruble ($6,787 U.S.), si Brother Sobyanin sang 494,000 ka ruble ($5,255 U.S.), kag si Brother Timoshkin sang 512,000 ka ruble ($5,447 U.S.) Indi nila kinahanglan mapriso sa sini nga tion.

Impormasyon Parte sa Ila

Vladimir Poltoradnev

Natawo: 1962 (Krasnoshekovo, Orenburg Region)

Biograpiya: Nag-obra sia bilang manugkay-o kag manugmentinar sang mga makina sa pagpanahi

Sang natun-an niya nga nagakatuman ang mga tagna sa Biblia, nangin interesado sia sa sini kag nagpa-Bible study sia. Nabawtismuhan sia bilang isa sa mga Saksi ni Jehova sang 2001

Ang Iya Ginsiling

Ano nga teksto sa Biblia ang nakabulig sa imo para mapabakod ang imo pagtuo kay Jehova?

Ang pagbasa sang 1 Samuel kapitulo 17 kag ang pagpamalandong sa sini nakabulig gid sa akon. May kaisog si David nga magpakig-away kay Goliat kay nadumduman niya kon paano sia ginbuligan ni Jehova sang una. Sa bersikulo 37, nagsiling sia: “Si Jehova, nga nagluwas sa akon sa leon kag sa oso, amo man ang magaluwas sa akon batok sa sining Filistinhon.” Sang ginpahog ako sang imbestigador nga puede ako prisuhon sing pulo ka tuig, sa umpisa nahadlok gid ako. Pero gindumdom ko ang madamo nga beses nga ginbuligan ako ni Jehova sa malawig nga tinuig kag nagpabakod ina sang akon pagtuo sa iya. Ginbuligan ako ni Jehova para masarangan ang bisan ano nga matabo sa akon. Nabal-an ko nga kontrolado niya pirme ang mga nagakatabo.

Aleksandr Sobyanin

Natawo: 1973 (Krasnovishersk, Perm Territory)

Biograpiya: Isa sia ka panday sa salsalon. Sang pamatan-on pa sia, ginpamensar niya kon ngaa nagakapatay ang mga tawo. Nalipay sia sang natun-an niya sa Biblia ang paglaum nga kabuhi nga wala sing katapusan. Nabawtismuhan sia sang 1992

Napangasawa niya si Mariya sang 2020

Ang Iya Ginsiling

Ano ang nakabulig sa imo nga padayon nga magsalig kay Jehova?

Kon makaatubang ako sang mga sitwasyon nga makapaduhaduha sa akon, ginapahanumdom ko sa akon kaugalingon ang ginsiling ni Jehova kay Jacob sa Genesis 31:12: “Nakita ko ang tanan nga ginahimo sa imo ni Laban.” Ginpasalig ni Jehova si Jacob nga nagatan-aw gid Sia, upod niya sia, kag nagaamlig sa iya. Kabalo ko nga amo man sina ang ginahimo ni Jehova sa akon. Kon pamatyag ko wala na ako sang nabilin nga kusog, pirme gid niya ako ginahatagan sang bulig nga kinahanglan ko para makabatas. Ang kada kabudlayan nga akon ginaatubang nagatudlo sa akon sang leksion nga si Jehova pirme gid nagabulig!

Nagasalig kita nga ang tanan nga padayon nga nagasalig kay Jehova makaeksperiensia gid sang pagpakamaayo sang iya mainunungon nga gugma.—Salmo 13:5, 6.

Time Line

Hulyo 28, 2020

Gin-raid ang ila balay. Ginbutang sa temporary detention ining tatlo ka brother
Hulyo 29, 2020

Si Vladimir Timoshkin gin-release sa temporary detention pero gin-house arrest
Hulyo 30, 2020

Si Aleksandr gin-release sa temporary detention pero ginbutangan sang restriksion ang iya pagbiyahe
Hulyo 31, 2020

Si Vladimir Poltoradnev gin-release sa temporary detention pero gin-house arrest
Septiembre 24, 2020

Gin-untat na ang pag-house arrest kay Vladimir Poltoradnev pero ginbutangan sang restriksion ang iya pagbiyahe
Oktubre 26, 2020

Gin-untat na ang pag-house arrest kay Vladimir Timoshkin pero ginbutangan sang restriksion ang iya pagbiyahe
Mayo 16, 2023

Ginsugdan ang hearing

a Wala mainterbyu si Brother Vladimir Timoshkin.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE