Sang Agosto 19, 2021, nagdesisyon ang Birobidzhan District Court of the Jewish Autonomous Region nga guilty si Sister Guzeva kag ginsentensiahan sia sing 30 ka bulan nga suspended prison.

Anastasiya Guzeva

• Natawo: 1979 (Birobidzhan)

• Biograpiya: Nagaisahanon lang ang iya iloy sa pagpadaku sa iya kag sa iya duha ka utod nga lalaki. Sang bata sia, nanamian sia sa sports, magbasa, kag magsaot. Sang dies anyos sia, may nakita sia nga Biblia sa balay sang iya lola. Amo ini ang nagpahulag sa iya nga tun-an pa gid ang parte sa Dios. Sang ulihi, nagtuon sila sang iya nanay sing Biblia upod sa mga Saksi ni Jehova. Nabawtismuhan sila sang 1995. Napamana niya si Konstantin sang 2001

Sang Mayo 2018, gin-raid sang mga awtoridad sang Russia ang apartment nanday Anastasiya kag Konstantin. Ginpasakaan si Konstantin sing kaso nga “extremism” sang Hulyo 2019 kag si Anastasiya naman sang Pebrero 2020. Sa kabilugan, 19 tanan ka kaso ang ginpasaka sa 23 ka Saksi sa Jewish Autonomous Region.

Bangod sa kaso nga ginpasaka kanday Anastasiya kag Konstantin, nagbudlay gid ang ila adlaw-adlaw nga pagkabuhi. Bangod man gin-akusar sila nga mga “extremist,” ginpahalin sila sa music school nga ila ginaobrahan. Ginsentensiahan si Konstantin sing duha ka tuig nga suspended prison sentence sang Pebrero 2021.

Ginsugid ni Anastasiya ang nakabulig sa iya nga makabatas: “Mas maayo kon paabuton mo na nga daan nga hingabuton ka gid kag pamensaran sing maayo kon ano ang imo himuon kon ara ka na sa mabudlay nga sitwasyon. Halimbawa, kon basahon mo ang rekord parte sa katapusan nga adlaw ni Jesus sa duta, maathag nga ginhunahuna gid niya sing maayo kon ano ang iya himuon kon arestuhon sia, . . . kon san-o sia mahambal, kon san-o sia mahipos, kag kon ano ang iya ihambal.”

Mas napalig-on pa gid si Anastasiya sa ginsiling sang Roma 8:38, 39. Nagsiling sia: “Kon basahon naton ina nga teksto, may rason gid kita nga malipay. Palangga ako sang duha ka pinakagamhanan nga persona sa uniberso, kag wala sing makapugong sa sina nga gugma. Nagpalig-on gid ini sa akon nga magbatas kag mangin maisog.”