Sang Enero 21, 2021, ginsentensiahan sang Obluchenskiy District Court of the Jewish Autonomous Region nga guilty si Sister Anastasiya Sycheva. Ginpamatbatan sia sing duha ka tuig nga suspended prison sentence. Indi sia kinahanglan nga prisuhon sa sini nga tion.

Anastasiya Sycheva

• Natawo: 1977 (Teploozyorsk, Jewish Autonomous Region)

• Biograpiya: May apat sia ka utod, pero ang duha napatay na. Naggradweyt sia sa isa ka medical school kag may nursing degree sia. Nag-obra sia sa clinic sang isa ka dentist kag sa isa ka psychiatric hospital. Sang mapatay ang iya magulang nga babayi, sia ang nag-atipan sa duha ka bata sini nga magagmay pa. Sia man ang nag-atipan sa iya iloy nga malawig nga nagbalatian asta nga napatay ini

  Sang tin-edyer pa sia, ginpaligban niya kon ngaa malip-ot lang ang kabuhi. Amo ini ang rason kon ngaa nagtuon sia sing Biblia kag nakita niya ang sabat sa iya mga pamangkot. Nabawtismuhan sia bilang isa sa mga Saksi ni Jehova sang 1994

Sang Oktubre 2019, si Anastasiya ginbutang sang mga awtoridad sang Russia sa listahan sang mga “extremist.” Sang Septiembre 25, 2019, ginpasakaan sia sing kaso kriminal sang Investigative Department of Russia’s Federal Security Service (FSB) sa Birobidzhan. Ginsumbong sia nga hungod kag padayon nga nagahimo sang mga hilikuton sang lokal nga organisasyon sang mga Saksi ni Jehova, kay nagatambong sia sa relihioso nga miting sini kag ginasugid niya sa iban ang parte sa iya mga pagpati.

Sang gin-hearing sia, ang mga nagasumbong sa iya may ginpaandar nga narekord nga mga tawag sa telepono ni Anastasiya kag may ginpagua man sila nga mga video sang mga miting nga iya gintambungan. Siling sang mga nagasumbong sa iya, ini nga mga audio kag video recording nagapakita nga ang aton sister nagahimo sang “extremist” nga hilikuton. Ining mga ebidensia kuno nga ginpagua sang mga nagasumbong sa iya, gingamit ni Anastasiya para makapanaksi sia. Ginpaathag niya nga sa miting sang mga Saksi ni Jehova, ginatudluan ang mga tawo kon paano mapakita ang mga kinaiya sang isa ka Cristiano, pareho sang kaluoy, pagpatawad, kag pagkamapinasensiahon.

Sa iya katapusan nga mensahe sa korte, gingamit ni Anastasiya ang kahigayunan para ipaathag kon paano nakabulig sa iya ang Biblia. Sia nagsiling: “Subong, ginahukman ako bangod sa akon pagtuo kag sa akon padayon nga paghimo sang mga hilikuton sang akon relihion. Buot silingon ginabasa ko ang Biblia, nagatipon ako upod sa akon mga abyan para mag-istorya parte sa Balaan nga Kasulatan, nagakanta ako sing mga kanta nga nagadayaw kay Jehova, kag nagapangamuyo ako sa iya.

“Indi ko gid mahimo nga indi pagtumanon ang sugo nga mabasa sa sulat para sa mga Hebreo, sa kapitulo 10, bersikulo 24 kag 25. Ini nagasiling: ‘Kag hunahunaon naton ang isa kag isa agod pahulagon sa gugma kag sa maayong mga buhat, nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa, kag labi na gid samtang nakita ninyo nga malapit na ang adlaw.’ Kon ang Labing Mataas nga Dios nga si Jehova ang nagsugo sa akon nga magtipon upod sa akon mga abyan kag sa akon mga kauturan, nga magbasa sang Biblia, nga pabakuron kag pakitaan sing kaayo ang isa kag isa, indi ko gid mahimo nga indi magtuman sa iya. Ginapalangga ko gid sia kag ginarespeto kag sia gid lang ang akon ginasimba.”

Nalipay kita nga mabal-an nga may kaisog nga gindepensahan ni Anastasiya ang iya pagtuo. Ginpakita man niya ang iya kabakod kag kompiansa. Ginapangamuyo naton nga indi madula ang iya kalipay kag kabay nga ini nga pagtilaw sa iya pagtuo padayon nga makabulig sa iya nga makabatas.—Santiago 1:2, 3.