Sang Hulyo 20, 2021, ang Birobidzhan District Court of the Jewish Autonomous Region nagdesisyon nga guilty si Anna kag ginsentensiahan sia sing duha ka tuig nga suspended prison.

Anna Lokhvitskaya

• Natawo: 1993 (Birobidzhan)

• Biograpiya: Ginpadaku sia sang iya iloy kag gintudluan nga tumanon ang mga prinsipio sang Biblia. Nabawtismuhan sia sang 2012. Sagad sia nga sastre. Napamana niya si Artur, sang 2018. Nanamian sila mangisda, magbiyahe, kag maghampang sing volleyball

Sang Pebrero 6, 2020, nalakip si Anna sa anom ka Cristiano nga sister nga ginkasuhan sang mga awtoridad sang Russia sa Birobidzhan nga nagahimo sing “extremist” nga mga hilikuton. Sa kabilugan, 19 ka Saksi ni Jehova ang ginpasakaan sing kaso sa sini nga lugar. Nalakip sa ila ang bana ni Anna nga si Artur kag ang iya ugangan nga si Irina.

Nangin mabudlay gid ang kabuhi sini nga mag-asawa bangod sa kaso nga ginpasaka sa ila. Indi sila makabiyahe, indi nila matandog ang ila kuarta sa banko, kag ginlimitehan man sang mga awtoridad ang ila kinamatarong nga makabaton sing benepisyo halin sa gobierno. Bangod sini, grabe gid ang stress ni Anna amo nga kon kaisa kinahanglan niya magpadoktor.

Ginsugid niya kon ano ang nakabulig sa iya. Nagsiling sia: “Naumpawan gid ako sang mga kanta halin sa aton broadcasting. Nakabulig ini sa akon nga mangin kalmado kag mangin positibo bisan ano man ang akon sitwasyon. Ang pag-exercise nakabulig man sa akon nga makapokus sa mga butang nga makapalig-on sa akon.”

Dugang pa, ginpanikasugan man ni Anna kag ni Artur nga unahon ang kinahanglanon sang iban. “Nangin goal namon nga maghatag sing regalo sa iban kada bulan, bisan gamay lang ini nga mga regalo. Ginatinguhaan namon nga pamensaron pirme ang iban kag indi lang ang amon mga problema.”

Ginahulat ni Anna ang desisyon sa iya kaso. Samtang wala pa ini, ginatamod niya ang iya sitwasyon nga ‘isa ka kahigayunan nga mapakita nga mainunungon sia kay Jehova paagi sa iya mga ginahimo.’—Salmo 18:25.