Irina Lokhvitskaya

• Natawo: 1962 (Izvestkovyi, Jewish Autonomous Region)

• Biograpiya: Napatay ang iya amay sang seis anyos sia. Sang bata sia, mahilig sia magsaot, mag-knit, mag-basketball, kag mag-volleyball. Miembro man sia sang isa ka theater

  Nanamian gid sia sa paglaum nga pagkabanhaw nga ginasugid sang Biblia. Nabawtismuhan sia bilang isa sa mga Saksi ni Jehova sang 1993. Pito ka bulan sa tapos sia nabawtismuhan, napatay ang iya bana. Gani sia na lang ang nagpadaku sa ila pito ka tuig nga bata nga si Artur

Sang Pebrero 6, 2020, nalakip si Sister Irina Lokhvitskaya sa anom ka sister nga ginkasuhan sang mga awtoridad sang Russia sa Birobidzhan nga nagahimo sang “exstremist” nga mga hilikuton. Sa kabilugan, 19 ka kaso na ang ginpasaka sa 22 ka Saksi sa sini nga lugar. Nalakip sa ila ang bata ni Irina nga si Artur kag ang iya asawa nga si Anna.

Ang pag-hearing sa kaso ni Irina wala ginbuksan sa publiko, amo nga indi maka-attend sa sini ang media kag ang iya mga paryente. Gin-deny ang iya mga petisyon nga buksan ang hearing sa publiko kag ibalik ang kaso sa piskal.

Daku gid ang epekto sini nga kaso sa iya panglawas kag emosyon. Pero nakabatas sia kay padayon niya nga ginahimo ang iya hilikuton para sa pagsimba. Nagsiling sia: “Ginbuligan ako ni Jehova nga padayunon ang akon maayo nga mga rutina. Ginabasa ko ang Biblia, kag naga-research gid ako para maintiendihan ko ini sing maayo.” Kon indi sia makabasa sang Biblia bangod sa kabalaka, nagapangayo sia sang bulig ni Jehova. Sia nagsiling: “Nagapangamuyo ako sing hugot, kag ginatinguhaan ko nga makabalik sa akon iskedyul. Gintudluan ako ni Jehova nga pamensaron pirme ang iban kag indi lamang ang akon kaugalingon.”

Gani ginapamensar pirme ni Irina kon sin-o ang mas nagakinahanglan sang bulig kag pagpalig-on. Lakip sa ila ang mga interesado sa Biblia kag ang iya Cristianong mga kauturan. Sia nagpaathag: “Kon nagapokus ka sa iban, wala ka na sing tion nga maluoy sa imo kaugalingon ukon magkabalaka sing sobra.”

Ginpalig-on man si Irina sang kongregasyon, ilabi na sang mga gulang. Nagsiling sia: “Bisan pa ginahingabot man sila, ginapalig-on nila ako, kag insakto gid nga mga tinaga ang ila ginahambal para paumpawan ako. Ara gid sila pirme bisan ano oras nga kinahanglan ko ang bulig, gani ginapasalamatan ko gid sila.”

Padayon nga ginabatas ni Irina ini nga kabudlayan. Pareho sa iya nagasalig man kita nga padayon nga ihatag ni Jehova ang tanan niya nga kinahanglan. Sia nagsiling: “Sadto kon makabasa gani ako parte sa mga ginahingabot, ginapensar ko kon ano ang akon himuon kon ako ang ara sa ila sitwasyon. Magasalig bala ako kay Jehova? Subong, bal-an ko na. Paagi sa iya bulig, magasalig ako sa iya. Pareho sa tanan nga matutom niya nga mga alagad, magapabilin ako nga malig-on kag uyatan ni Jehova ang akon tuo nga kamot.”—Isaias 41:10.