Sang Pebrero 12, 2021, ginpahibalo sang Birobidzhan District Court of the Jewish Autonomous Region ang desisyon sini sa kaso ni Sister Larisa Artamonova. Bisan mahimo sia mapriso sing asta sa anom ka tuig, ang korte nagdesisyon nga multahan na lang sia sing 10,000 rubles ($135 U.S.).

Larisa Artamonova

• Natawo: 1970 (Birobidzhan, Jewish Autonomous Region)

• Biograpiya: Ginpatay ang iya tatay sang tatlo pa lang sia ka tuig. Nagtrabaho sia bilang isa ka pastry chef, graphic designer, kag sastre. Nagmapana sia sang 1990. May isa sia ka bata nga lalaki nga si Yevgeniy nga may indi kinaandan nga balatian. May autoimmune disease man sia nga nagahalit sa iya mga lutalutahan. Bisan pa may ginabatyag sia sa iya lawas, madamo gihapon sia sing mahimo. Nanamian sia mag-bike, mag-skate, mag-ski, kag magdrowing

  Bangod sa iya mga pamangkot parte sa inhustisya, kasubo, kag kalautan, nagtuon sia sing Biblia upod sa mga Saksi ni Jehova. Nakita niya sa Biblia ang mga sabat sa iya pamangkot, kag nabawtismuhan sia sang 1995

Sang Septiembre 25, 2019, ginpasakaan sang mga awtoridad sang Russia sing kaso kriminal si Sister Larisa Artamonova. Ang iya bata nga lalaki ginpasakaan man sing lain nga kaso. Nalakip sila sa 22 ka Saksi halin sa Jewish Autonomous Region nga ginkasuhan nga nagapakigbahin sa mga hilikuton sang isa ka “extremist” nga organisasyon.

Ang nanay kag ang stepfather ni Larisa daw indi makapati nga ginsentensiahan sia nga mapriso sing anom ka tuig bangod sa iya relihioso nga mga pagpati. Kay man, ang kalawigon sang sentensia sa iya pareho sa kalawigon sang sentensia sa tawo nga nagpatay sa iya tatay.

Antes pa nagsugod ang paghingabot sa Birobidzhan, nangin masako gid si Larisa kag ang iya bata sa pag-alagad kay Jehova. Nagsiling sia: “Kon pirme ka masako sa pag-alagad kay Jehova kag padayon mo nga ginapabakod ang imo pagtuo kag ang pagtuo sang imo pamilya, wala ka sing ginakahadlukan.” Nagsiling pa gid sia: “Ginagamit ni Satanas ang mga nagahingabot sa aton para papatihon kita nga madula ang aton kahilwayan kon padayon naton nga himuon ang aton mga hilikuton bilang Cristiano. Pero, ginapasalig kita ni Jehova nga matigayon naton ang matuod nga kahilwayan kon himuon naton ang iya kabubut-on.”

Ang 22 ka kauturan sa Birobidzhan nga ginkasuhan nagasalig nga nalipay si Jehova sa ila ginapakita nga katutom. Maathag gid nga ginasabat nila ang mga pagyaguta ni Satanas.—Hulubaton 27:11.