Sa indi madugay ipahibalo sang Birobidzhan District Court of the Jewish Autonomous Region ang desisyon sini sa kaso ni Sister Nataliya Kriger. a Wala pa sing may ginsiling ang piskal kon ano nga sentensia ang gusto niya sa sini nga kaso.

Nataliya Kriger

• Natawo: 1978 (Khabarovsk)

• Biograpiya: Napatay ang iloy ni Nataliya sang lapsag pa lang sia. Ginbutang sia sa orphanage. Sang anom sia ka tuig, nagsaylo sia sa Amurzet, Russia, nga mga 400 kilometros ang kalayuon. Nag-istar sia didto upod sa iya lola, tiya, kag pakaisa nga mga Saksi ni Jehova. Nagtrabaho sia bilang social worker nga nagaatipan sang mga tigulang

• Nabawtismuhan sia bilang isa sa mga Saksi ni Jehova sang 1999. Napamana niya si Valeriy sang 2017. Mahilig sila magsaot, kag nanamian man sila mag-rafting kag mag-hiking

Sang Mayo 2018, gin-raid sang mga awtoridad ang balay nila nga mag-asawa. Ini nga pag-raid nalakip sa operasyon sang mga awtoridad nga ginatawag nila nga “Adlaw sang Paghukom.” Pagkatapos sini, ginpasakaan sang piskal sing kaso kriminal si Valeriy. Sang Pebrero 6, 2020, ginpasakaan man sang awtoridad sing kaso kriminal si Nataliya. Isa sia sa anom ka sister nga ginkasuhan sina nga adlaw.

Magluwas sini nga paghingabot, nagakalisod pa si Nataliya sa pagkapatay sang iya lola sang Pebrero 2020. Gin-atipan niya ang iya lola sing mga anom ka tuig.

Nakabulig kay Nataliya ang iya mabakod nga relasyon kay Jehova nga mabatas ang kabudlayan nga iya naeksperiensiahan. Nagsiling sia: “Pirme ko ginapangamuyo ang iban. Nakabulig ini sa akon nga indi magpokus sa akon mga problema. Bangod man sa sini nga paghingabot, nangin suod pa gid ako kay Jehova kag nabatyagan ko gid nga matuod sia nga Dios. Naeksperiensiahan ko nga ginsabat gid ni Jehova ang akon mga pangamuyo kag ginabuligan gid niya ako.”

Pirme ginapamalandungan ni Nataliya ang madamo nga rason kon ngaa nagasalig sia nga padayon sia nga buligan ni Jehova. Nagsiling sia: “Napabakod gid ako sa ginasiling sang Salmo 94:19: ‘Ginlugpayan kag ginpaumpawan mo ako.’ Madamo sing halimbawa sang maisog nga mga alagad sang Dios sadto kag subong nga nagbatas sang mga paghingabot. Ginapamalandungan ko ini nga mga halimbawa. Nakahatag ini sa akon sing dugang nga kusog.”