Sa Septiembre 29, 2020 * ipahibalo sang Pervorechenskiy District Court sang Vladivostok ang desisyon sini sa kaso ni Sister Yelena Barmakina. Mahimo sia pamatbatan sing tatlo ka tuig nga suspended prison sentence. Samtang ginahulat ni Sister Barmakina ang desisyon sa iya kaso, padayon man ang pagbista sa kaso nga ginpasaka sa iya bana nga si Dmitriy.

Yelena Barmakina

• Natawo: 1967 (Cherepanovo, Novosibirsk Region)

• Biograpiya: Sia ang nagaatipan sa iya tigulang na nga mga ginikanan kag pati sa iya lola. Mahilig sia sa photography kag nangin isa ka propesyonal nga photographer. Nanamian sia maglangoy kag mag-hike

• Sang nagtuon sia sa Biblia upod sa mga Saksi ni Jehova, natun-an niya ang parte sa mga tagna nga nagakatuman. Bangod sini, nakumbinsi sia nga ang Dios gamhanan gid kaayo. Nagsugod nga magbakod ang iya pagtuo sang nakita niya nga ginasabat ni Jehova ang iya pangamuyo. Ginpamana niya si Dmitriy sang 2006

Sang alas 7:00 sang aga sang Hulyo 28, 2018, puersa nga ginsulod sang armado nga mga pulis nga may tabon ang guya ang apartment sang 90 anyos nga lola ni Sister Yelena Barmakina. Si Sister Barmakina kag ang iya bana nga si Dmitriy dira man nagaistar kay ginaatipan nila ang iya lola. Gin-aresto si Brother Barmakin kag ginbutang sa pretrial detention. Ginpahog man sang mga pulis si Sister Barmakina, kag ginsilingan: “Ikaw ang amon isunod!”

Pagligad sang isa ka tuig, wala na gintugutan sang awtoridad si Sister Barmakina nga makakuha sang kuarta sa iya mga bank account. Sang Agosto 6, 2019, ginpasakaan sia sing kaso kriminal sang isa ka imbestigador bangod sa pagpangamuyo, pagbasa sang Biblia, kag pagtan-aw sang mga pamulongpulong base sa Biblia. Ang iya abogado nagpangabay sa korte nga ibasura ang mga panumbungon batok sa iya bangod ang iya mga ginhimo normal lang nga mga hilikuton sang relihioso nga mga tawo. Pero, ginpaboran sang judge ang panumbungon nga ang ginhimo ni Sister Barmakina makabig “nga mga hilikuton sang extrimist” nga ginadumilian sang kasuguan sang Russia.

Nabatyagan gid ni Sister Barmakina ang grabe nga stress kag kabalaka bangod sa mga imbestigasyon kag kaso kriminal nga ginpasaka batok sa iya. Indi man sila updanay sang iya bana sa sulod sang 447 ka adlaw sang ginbutang ini sa pretrial detention. Nabudlayan man sia magpangita sing obra kay dapat mag-absent sia sa obra kada ipatawag sia sang korte para sa pagbista ukon pag-imbestigar sa iya.

Bangod natun-an na naton ini sa Biblia, wala kita natingala kon ngaa ‘ginatiklod sing mabaskog’ sang mga awtoridad sa Russia ang aton mga kauturan para paluyahon ang ila integridad. Kabalo kita nga si Jehova amo pirme ang ila ‘palasilungan kag kusog’ kag makapaumpaw gid ini sa aton.—Salmo 118:13, 14.