Sa Enero 29, 2021, a ipahibalo sang Birobidzhan District Court of the Jewish Autonomous Region ang desisyon sini sa kaso ni Sister Yelena Reyno-Chernyshova. Wala pa sing may ginsiling ang piskal kon ano nga sentensia ang gusto niya para kay Sister Yelena.

Yelena Reyno-Chernyshova

• Natawo: 1968 (Maloy, Irkutsk Region)

• Biograpiya: Nagtuon sia sing Biblia upod sa mga Saksi ni Jehova sang dekada ’90. Bangod sini nag-untat sia sa pagkasoldado kag nanikasog sia para mangin maayo ang ila pag-updanay sang iya bana. Nabawtismuhan sia sang 1998

• Ang iya bana indi Saksi, pero ginasuportahan sia sini sa iya desisyon nga alagaron si Jehova. Nanamian sia maghampang sing soccer kag volleyball

Sang Septiembre 29, 2019, ginpasakaan sang mga awtoridad sa Birobidzhan sing kaso kriminal si Sister Yelena Reyno-Chernyshova.

Ginhalughog sang mga agent sang Federal Security Service (FSB) ang balay ni Yelena. Nagapasalamat gid sia kay Jehova kay ginbuligan sia nga mangin kalmado. Nagsiling sia: “Nangamuyo ako kay Jehova nga buligan niya ako nga mangin kalmado kag maisog para indi ko sia mapakahuy-an kag makapabilin ako nga matutom sa iya. Katawhay lang sang paghalughog nila kag kaayo sang mga agent.”

Indi gid maayo ang epekto sang kaso kay Yelena kag sa iya pamilya. Gin-heart attack sang Hulyo 2020 ang iya bana kag ikatlo na ini nga pag-atake sa iya. Gindumilian sang awtoridad si Yelena nga magbiyahe sa gua sang Birobidzhan. Gin-freeze man sang awtoridad ang iya mga bank account.

Ginpamalandungan ni Yelena ang eksperiensia sang mga alagad ni Jehova nga ginhingabot man. Nakabulig ini sa iya nga mangin mabakod. Nagsiling sia: “Nanamian ako magbasa sang mga report parte sa mga kauturan nga gin-raid ang ila mga balay kag ginhingabot bangod sang ila pagtuo kay Jehova. Madamo sila sing naagyan nga mga kabudlayan kag ginmaltrato pa gani sila, pero nabatas nila ini tanan.” Nakabulig man sa iya ang iya regular nga pagbasa sing Biblia kag pagpamalandong.

Samtang padayon sia nga nagabatas, ginapamalandungan pirme ni Yelena ang Isaias 30:15. Nagasiling ini: “Mangin mabakod kamo kon magpakalinong kamo kag magsalig sa akon.” Nagsiling sia: “Pirme ko ginapamensar ini nga teksto. Nagapasalamat gid ako kay Jehova kay ginbuligan niya ako nga makilala sia. . . . Malinong pirme ang akon hunahuna. Mas nagsalig pa gid ako kay Jehova, gani bisan ano man ang matabo sa akon sigurado ako nga indi niya ako pagpabay-an.”