Sang nagligad lang nga 18 ka bulan, ginhalughog sang mga pulis kag sang mga agent sang Federal Security Service (FSB) sa Russia ang 613 ka balay sang aton kauturan. Sugod sang Enero 2019, nahalughog na sang mga awtoridad ang 332 ka balay—nalapawan na sini ang 281 nga nahalughog nila sang 2018.

Sining nagligad nga mga binulan, ginatarget gid sang mga awtoridad ang aton kauturan. Sang Hunyo, 71 ang ginhalughog, kag 68 sang Hulyo—mas madamo gid ini kon ikumparar sa 2018 nga may 23.4 lang nga kadamuon sang pagpanghalughog kada bulan.

Sa kinaandan nga paghalughog, ang mga agent nga may tabon ang nawong kag kompleto sa armas pilit nga magasulod sa isa ka balay ukon apartment. Kon makasulod na sila, kon kaisa ginatayaan sang mga agent sing pusil sa nawong ang mga Saksi, pati ang mga bata kag mga tigulang, kag ginatrato sila nga daw makatalagam nga mga kriminal. Gani indi katingalahan nga ang pila ka eksperto nagaugyon kay Dr. Derek H. Davis, nga direktor anay sang Baylor University’s J.M. Dawson Institute of Church-State Studies, nga nagsiling: “Ang mapintas nga paghingabot sang Russia sa isa ka mahidaiton nga grupo pareho sang mga Saksi ni Jehova matawag na gid nga “sobra na kaayo.”

Pero masubo nga samtang nagadamo ang mga balay nga ginahalughog, nagadugang man ang mga kaso kriminal batok sa aton kauturan. Subong, 244 na ka kauturan ang ginpasakaan sing kaso kriminal sa Russia kag Crimea. Sobra ini sa pilo kon ikumparar sa Disiembre 2018, nga may ara pa lang 110 ka kaso kriminal sadto. Sa 244 ka kauturan nga may kaso, 39 ang ara sa prisuhan, 27 ang gin-house arrest, kag sobra 100 ang ginhatagan sing sarisari nga restriksion.

Bisan pa padayon nga ginatarget sang mga awtoridad sang Russia ang aton kauturan, ‘indi kita malingkang bangod sini nga mga kapipit-an.’ Kundi, ginapalig-on kita sang mga report nga ang aton mga masigkatumuluo nagapabilin nga matutom kag nagabatas. Gani, ginadayaw naton kag ginapasalamatan si Jehova sa iya pagsabat sa aton madamo nga pangamuyo para sa ila, kag nagasalig kita nga padayon niya ini nga himuon.—1 Tesalonica 3:3, 7.