Sang Abril 2017, gin-ban sang Russia ang mga hilikuton sang mga Saksi ni Jehova. Sugod sadto, sobra na 500 ka kauturan ang gin-aresto kag ginkasuhan nga mga extremist. Mga 40 ka Saksi ang ginsentensiahan nga mapriso, kag 15 ang ginmultahan. Sobra 80 ka Saksi ang ginsentensiahan nga guilty kag ginhatagan sing suspended prison sentence. Ang mga ginsentensiahan sing suspended prison sentence indi kinahanglan nga mapriso sa sini nga tion, pero indi gid makatarunganon ang sentensia sa ila kag mabudlay gid ang ila sitwasyon.

Suno sa Criminal Code of Russia, may gahom ang isa ka judge nga sentensiahan sing suspended prison sentence ang isa nga gin-akusahan sa baylo nga prisuhon ini. Kon amo sini ang sentensia nga ihatag sang judge, hatagan man niya sing probation ang akusado kag may ipatuman nga mga restriksion ukon mga kondisyon. Kon malapas sang akusado ang probation nga ginhatag sa iya, mahimo magdesisyon ang korte nga prisuhon sia pareho sa kalawigon sang ginsentensia sa iya nga suspended prison sentence.

Ano ang kahimtangan sang isa nga ginsentensiahan sing suspended sentence? Kag paano ginabuligan ni Jehova ang aton mga kauturan? Gin-interbyu namon ang pila nga ginsentensiahan sing suspended sentence. Ang kalawigon sang sentensia sa ila duha asta anom ka tuig. Ginsugid nila ang kabudlayan nga ila naeksperiensiahan kag kon paano sila ginbuligan ni Jehova nga makabatas.

Kanami gid nga nahibaluan naton ang sitwasyon sang kabuhi sang mga ginsentensiahan sing suspended sentence. Nagapahulag ini sa aton nga ipangamuyo pa gid naton sila kag ang ila pamilya. Ang ila eksperiensia nagapamatuod nga ginasabat gid ni Jehova ina nga mga pangamuyo kag ginabuligan niya ang iya mga alagad bisan ano man nga kabudlayan ang ila maagyan.—2 Corinto 1:3, 4.