Sang Septiembre 9, 2019, gindeklarar ni Judge Svetlana Anatolyevna Prokofyeva sang Kaluga Regional Appeals Court nga ang Kaluga District Court nakahimo sing mabug-at nga paglapas sa kasuguan sang nagdesisyon ini nga prisuhon si Brother Dmitriy Kuzin bisan wala pa sia mabista.

Ini nga desisyon ni Judge Prokofyeva talalupangdon gid kay talagsa lang ginaaku sang mga hukom nga indi makatarunganon ang pagtrato sang mga korte sa mga Saksi ni Jehova sa Russia. Suno sa sini nga hukom, pila ka beses nga ginlapas sang korte ang kasuguan. Napamatud-an nga ginyaguta sang district court si Brother Kuzin bangod sa relihioso nga mga pagpati kag wala sia ginhatagan sing kahigayunan nga mapangapinan ang iya kaugalingon. Nagsiling man si Judge Prokofyeva sa iya desisyon nga “indi gid masiling nga nangin makatarunganon ang hukom nga nag-uyat sang kaso [sa district court].”

Si Brother Kuzin gin-aresto sang Hunyo 26, 2019, sang ginhalughog sang mga agent sang Federal Security Service (FSB) sa Kaluga ang iya apartment. Pagligad sang duha ka adlaw, ang Kaluga District Court nagdesisyon nga prisuhan si Brother Kuzin sing duha ka bulan bisan wala pa sia mabista. Sang Agosto 19, ang imbestigador sang FSB sa sina nga siudad nag-file sing motion sa amo gihapon nga korte nga palawigon sing duha pa gid ka bulan ang pagpriso kay Brother Kuzin. Ginpasugtan ini sang korte.

Nag-appeal si Brother Kuzin sa mas mataas nga regional court, kag si Judge Prokofyeva ang nag-uyat sini. Bangod nakita niya nga ginlapas sang hukom sang lower court ang kasuguan, nagmando sia nga ibalik ang kaso ni Brother Kuzin sa lower court para binagbinagon liwat sang lain na nga hukom. Pero makapasubo nga sang Septiembre 23, ang district court, sa pagdumala sang lain na nga hukom, nagdesisyon gihapon nga palawigon sing duha pa ka bulan ang pagpriso kay Brother Kuzin.

Nagasalig kita nga si Jehova, ang mainunungon kag matarong nga Dios, padayon nga magaatipan sa aton kauturan sa Russia nga nagasalig sa iya.—Deuteronomio 32:4, 9-11.