Sang Nobiembre 24, 2021, ang Sovetskiy District Court of Lipetsk nagdesisyon nga guilty si Viktor, si Aleksandr, kag si Artur kag ginmultahan ang kada isa sa ila sing 500,000 rubles ($6,700 U.S.). Pero, 300,000 rubles ($4,000 U.S.) lang ang pabayaran sa ila bangod ginbuhin sang korte ang tion nga ara sila sa pretrial detention. Indi sila kinahanglan nga mapriso.

Viktor Bachurin

• Natawo: 1962 (Pavlovsky Posad, Moscow Region)

• Biograpiya: May duha sila ka bata sang iya asawa kag may isa ka apo. Nagtuon sia sing Biblia upod sa mga Saksi ni Jehova sang mga dekada ’90 kag nabawtismuhan sia sang 1992. Subong, sia lang ang Saksi sa ila pamilya

Aleksandr Kostrov

• Natawo: 1961 (Sortavala, Republic of Kareli)

• Biograpiya: Isa sia anay ka piloto, gas kag electric welder, kag elektrisyan. Napangasawa niya si Larisa sang 1997. May duha sila ka bata. Retirado na sia kag nanamian sia mangisda. Sang gin-aplikar niya ang mga panudlo sang Biblia, narealisar niya nga may maayo ini nga epekto sa iya kabuhi. Gani, nagpabawtismo sia sang 2002

Artur Netreba

• Natawo: 1978 (Glodeni, Moldova)

• Biograpiya: Napangasawa niya si Svetlana sang 1995 kag may isa sila ka bata nga babayi. Nagsaylo sila sa Lipetsk para mangita sing obra. Nagatrabaho sia bilang isa ka sales manager. Sang gin-aplikar niya ang mga panudlo sang Biblia, nangin malipayon sia kag nangin kumbinsido nga may maayo ini nga epekto sa iya kabuhi. Nabawtismuhan sia sang 2000

Sang Disiembre 2, 2019, gin-raid sang mga awtoridad ang pito ka balay sa Lipetsk Region. Gin-aresto sanday Brother Viktor Bachurin, Brother Aleksandr Kostrov, kag Brother Artur Netreba. Ginkasuhan sila sang Federal Security Service (FSB) nga “nakahimo sing mabug-at nga krimen batok sa kasuguan” bangod sa ila pagtambong sa mga miting sa kongregasyon kag paghimo sang pila ka hilikuton sang ila relihion. Gindala ang mga brother sa pretrial detention kag gin-detain sila sing 331 ka adlaw.

Si Aleksandr nagsiling nga mas nagsuod pa gid sia kay Jehova halin sang gin-detain sia: “Sang naagyan ko ini nga pagtilaw, narealisar ko nga ang una gid nga makabulig sa imo amo si Jehova.”

Ginsugid ni Artur ang determinado gid niya nga himuon. Nagsiling sia: “Determinado gid ako nga padayon nga mangin malipayon ukon magpokus sa mga butang nga makapabakod sa akon. Pirme ko ginapamensar nga indi man magadugay ang akon naeksperiensiahan kag sigurado nga pabakuron ako sang akon Amay. Bisan diin man ako, isugid ko sa iban ang parte sa aton balaan nga Dios, si Jehova.”

Si Victor nagsiling: “Sang naeksperiensiahan ko ining mabudlay nga sitwasyon, ginpakita gid ni Jehova sa akon nga sia ang akon best friend. Pirme gid niya ginapabatyag sa akon nga palangga niya ako.”

Ginapasalamatan gid ni Viktor ang bulig sang mga kauturan para sa iya indi Saksi nga asawa sugod sang gin-detain sia. Si Viktor nagsiling: “Nalipay gid sia sa pag-ulikid sang mga kauturan sa iya. Sigurado ako nga napanaksihan gid sing maayo ang akon pamilya bangod nakita nila nga nagapalanggaanay gid ang katawhan ni Jehova.”

Kabalo kita nga bisan pa padayon nga ginahingabot ang tanan naton nga kauturan sa Russia kag sa iban pa nga pungsod, sigurado nga pabakuron gid sila ni Jehova.—Isaias 51:12.