Sang Biernes, Agosto 30, 2019, ginpahayag ni Brother Valeriy Moskalenko ang iya katapusan nga mensahe sa korte. Ang masunod amo ang bahin sang transcript (gin-translate halin sa Russian) sang iya mensahe:

Your Honor kag sa talahuron nga mga tumalambong, 52 anyos ako kag halin sang nagligad nga tuig ginpriso ako. Ang matuod, sobra na isa ka tuig.

Sa akon katapusan nga mensahe sa korte subong, gusto ko isugid sing malip-ot ang parte sa akon kaugalingon, ang akon pagtamod sa mga kaso kriminal batok sa akon, kag ang akon personal nga pagtamod sa kabuhi. Nagalaum gid ako, Your Honor, nga maintiendihan mo kon ngaa indi ko pagtalikdan ang akon pagtuo sa Dios kag kon ngaa ang pagpati sa Dios indi isa ka krimen.

Indi ako isa sa mga Saksi ni Jehova sadto. Mabuot ang akon mga ginikanan kag maayo ang ila pagpadaku sa akon, pero halin sang bata pa ako ginapaligban ko na kon ngaa wala gid sing katarungan bisan diin. Sa pensar ko, ‘Indi dapat amo sini—ang malain nga mga tawo kag ang mga manugtunto nagatin-ad, kag ang honest kag mabuot nga mga tawo nagaantos.’

Sang 24 anyos ako, gin-research ko kag gintun-an sing maayo ang Biblia sa sulod sang pila ka bulan, kag nakita ko ang sabat sa akon mga pamangkot.

Sugod sadto, ginatinguhaan ko nga antes ako magdesisyon, binagbinagon ko anay ang ginabatyag, kasuguan, kag prinsipio sang Dios nga detalyado nga mabasa [sa Biblia] kag makita sa kabuhi sang [mga sumilimba] nga nagkabuhi sang una.

Nagaistar ako upod kay Nanay sa isa ka apartment. Tigulang na sia kag kinahanglan niya ang akon pag-atipan. Sang Agosto 1, 2018, sang isa lang si Nanay sa balay, ginsugo sang imbestigador sang Federal Security Service (FSB) ang Special Forces nga lagarion ang bisagra sang amon mayor nga puertahan. Amo sini ang gusto sang imbestigador nga paagi para makasulod kag mahalughog ang amon ginaistaran.

Hinadlukan gid si Nanay. Sang makasulod ang Special Forces nga may tabon sa guya, gin-atake sa tagipusuon si Nanay kag kinahanglan magtawag sing ambulansia. Sang mabal-an ko nga may mga pulis sa amon balay, nag-abot ako dayon pagligad sang 30 minutos. Sang makita ko ang sitwasyon ni Nanay, gin-high blood man ako. Pero, wala ako mangakig kag gintinguhaan ko gid nga mangin kalmado lang. Ginpakita ko sa ila ang kaayo—nga amo ang dapat himuon sang isa ka Cristiano. Amo sina ang gintudlo sa akon sang akon Dios nga si Jehova, kag indi ko gusto nga supakon sia.

Pasensia gid, your Honor, wala ako pirme nagaistorya parte sa akon kaugalingon. Indi ko batasan nga himuon ina, pero subong dapat ko ina himuon.

Sobra 25 ka tuig na nga isa ako sa mga Saksi ni Jehova. Daku gid ina nga bahin sang akon kabuhi. Kag sa sulod sina nga panahon, wala gid ako ginkabig nga batok sa gobierno. Kundi, kilala ako bilang maayo nga kaingod, mapisan, kag mapinalanggaon nga anak.

Gulpi lang, sugod sang Abril 20, 2017, gintawag na ako nga batok sa gobierno. Sa ano nga basihan? Ano ang nagbag-o? Nangin malain bala ako? Wala. Nangin mapintas bala ako ukon may ginsakit bala ako ukon ginpaantos? Wala. Ginkuhaan bala ako sing kinamatarong base sa Article 28 sang Russian Constitution? Wala. Ang akon ngalan wala nalista sa desisyon sang Supreme Court. Wala sing bisan sin-o nga nagkuha sang akon kinamatarong nga gamiton ang Constitution of the Russian Federation, ilabi na ang Article 28. Ti, ngaa ari ako bilang isa nga gin-akusar?

Sa akon pagpakig-istorya sa imbestigador, nangin mas maathag nga gin-aresto ako kag ginpriso bangod isa ako ka tumuluo nga nagagamit sang ngalan sang Labing Gamhanan nga Dios, nga si Jehova, sa akon mga pangamuyo kag paghambal. Pero indi ina krimen. Ang Dios mismo ang nagpili sang iya ngalan kag ginsigurado niya nga masulat ini sa Biblia.

Sa liwat, suliton ko. Indi ko gid mahimo nga supakon ang kabubut-on sang Dios nga maathag nga ginatudlo sang Biblia. Kag bisan ano pa nga pressure ukon silot ang ihatag sa akon, bisan sentensiahan pa ako sing kamatayon, ginapahibalo ko nga indi ko gid pagtalikdan ang labing gamhanan nga Manunuga sang uniberso, si Jehova nga Dios.

Your Honor, ang mga Saksi ni Jehova kilala sa bilog nga kalibutan bilang mainabyanon kag mahidaiton nga mga tawo. Ang ila kinamatarong bilang mga tumuluo ginarespeto sa kalabanan nga pungsod sa bilog nga kalibutan. Gusto ko gid nga kuntani ang kinamatarong sang mga tumuluo sa Russia respetuhon man, kag sa akon kaso, ang akon kinamatarong bilang isa ka tumuluo.

Indi ako guilty sa krimen nga ginpasaka batok sa akon kag ginapangabay ko ang korte nga magpapanaug sing desisyon nga indi ako guilty!

Salamat!