PEBRERO 3, 2022
RUSSIA

UPDATE | Ang Pagpabilin nga Masako Nakabulig kay Brother Andrey Vlasov nga Mangin Positibo Pirme

I-PLAY

Sang Mayo 23, 2022, nagdesisyon ang Central District Court of the City of Prokopyevsk nga guilty si Brother Andrey Vlasov kag ginsentensiahan sia nga mapriso sing pito ka tuig. Ginpriso sia gilayon.

Time Line

Hulyo 2, 2020

Ginpasakaan sing kaso si Andrey kay ginasuspetsahan sia nga nagaorganisar sang mga hilikuton sang isa ka extremist nga organisasyon
Hulyo 12, 2020

Gin-raid sang mga agent sang FSB ang balay kag ulubrahan ni Andrey. Ginkumpiskar nila ang mga gadyet kag mga Biblia. Ginpriso sia sa temporary detention center samtang ginainterogar ang iya asawa nga si Nataliya
Hulyo 14, 2020

Ginpagua sia sa detention center kag gin-house arrest na lang
Hunyo 9, 2021

Nagsugod ang hearing

Impormasyon Parte sa Iya

Andrey Vlasov

Natawo: 1968 (Prokopyevsk, Kemerovo Region)

Biograpiya: Nanamian sia magdrowing kag mamati sa musika. Nag-obra sia bilang photographer

Ang iya manghod nga lalaki ang nagtudlo sa iya sang Biblia. Nabawtismuhan sia bilang isa sa mga Saksi ni Jehova sang 1991. Napangasawa niya si Nataliya sang 2003

Ang Iya Ginsiling

Ano ang ginhimo mo para pirme ka positibo?

Nakabulig sa akon nga mangin positibo pirme kon masako ako kada adlaw. Nagabasa ako sang Biblia, nagahanda para sa mga miting, nagatan-aw sang mga video sang organisasyon, naga-paint, kag nagapamati sa mga audiobook. Nagaobra man ako sa sulod sang balay, nagahampang sang chess, nagapanahi, kag nagahampang sang mga mind game.

Paano ka ginpalig-on sang imo mga kauturan?

Napalig-on ako kon silingan ako sang mga kauturan nga ginalakip nila ako sa ila pangamuyo, nga ang akon halimbawa nagapabakod sa ila, kag gusto man nila nga mangin matutom kay Jehova.

Ano nga mga bersikulo sa Biblia ang nanamian mo gid, kag paano ini nagbulig sa imo?

Ang 1 Pedro 4:12-14 nakabulig sa amon nga mag-asawa nga mabatas ang pag-raid sang mga pulis sa amon balay, ang imbestigasyon, kag ang madamo nga hearing sa korte. . . . Ginasulat namon ang mga bersikulo kag ginabutang ini sa lugar nga makita namon pirme. Sang gin-house arrest ako, ginabinagbinag namon nga mag-asawa ini nga mga teksto kag nagpahanumdom ini sa amon nga indi gid kami pagbiyaan ni Jehova. Sang ara ako sa temporary detention facility, ang Isaias 40:10-13 nagpabakod sa akon. Ang kakalma nga naeksperiensiahan ko sa sinang mga tinion daw lana nga nagapakalma sa akon tagipusuon.

Pribilehiyo gid naton nga mangin masigkamanugpangabudlay ni Andrey kag sang iban nga kauturan sa Russia kag Crimea samtang nagapabilin sila nga malipayon kag malig-on sa ila pagtuo.—2 Corinto 1:24.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE