DISIEMBRE 16, 2021
RUSSIA

UPDATE | Ang Personal nga Pagbasa sing Biblia Adlaw-adlaw Nakabulig sa Lima ka Brother kag Isa ka Sister nga Mabatas ang Paghingabot

I-PLAY

Sang Agosto 22, 2022, ang Leninskiy District Court of Saransk nagdesisyon nga guilty sanday Brother Denis Antonov, Brother Vladimir Atryakhin, Brother Aleksandr Korolev, Brother Georgiy Nikulin, Sister Yelena Nikulina, kag Brother Aleksandr Shevchuk. Sanday Denis, Aleksandr Korolev, kag Aleksandr Shevchuk ginsentensiahan nga mapriso sing tag-duha ka tuig. Si Georgiy kag si Yelena ginsentensiahan nga mapriso sing apat ka tuig kag duha ka bulan, kag si Vladimir ginsentensiahan nga mapriso sing anom ka tuig. Gilayon nga ipatuman ang ila sentensia.

Time Line

Hunyo 11, 2021

Ginsugdan sang Leninskiy District Court of Saransk ang una nga sesyon para sa sini nga kaso
Abril 2, 2021

Si Yelena gin-akusar nga nagapakigbahin sa mga hilikuton sang isa ka extremist nga organisasyon kag nagapang-recruit sia
Marso 31, 2021

Si Vladimir gin-akusar nga nagaorganisar sang mga hilikuton sang isa ka extremist nga organisasyon
Hulyo 2, 2019

Sanday Aleksandr Shevchuk kag Georgiy ginpagua sa pretrial detention kag ginmanduan nga indi maghalin sa ila lugar
Marso 28, 2019

Si Vladimir ginpagua sa pretrial detention kag ginmanduan nga indi maghalin sa ila lugar
Pebrero 8, 2019

Sanday Aleksandr Shevchuk, Vladimir, kag Georgiy ginbutang sa pretrial detention center
Pebrero 4, 2019

Ginpasakaan sing kaso sang FSB ang lima ka brother kag si Yelena. Ginkasuhan sila nga nagaorganisar sang mga hilikuton sang isa ka extremist nga organisasyon

Impormasyon Parte sa Ila

Denis Antonov

Natawo: 1976 (Syktyvkar, Komi Republic)

Biograpiya: Sang bata pa sia, ang iya tatay naga-manage sang mga uma, amo nga pirme lang nagasaylosaylo ang ila pamilya. Nag-eskwela sia sa isa ka technical school para mangin mining equipment electrician kag mekaniko

Nag-obra sia sa isa ka minahan bilang electrical technician sa sulod sang lima ka tuig. Mahilig sia sa photography kag chess

Madamo sia sing pamangkot parte sa Dios kag gintinguhaan man niya nga intiendihon ang mga balasahon parte sa relihion kag ang Biblia pero indi gid niya ini maintiendihan. Sang nagsoldado sia, ginasulatan sia sang iya abyan nga nagatuon sing Biblia upod sa mga Saksi ni Jehova. Natandog gid ang tagipusuon ni Denis sang natun-an niya nga sibu gid ang Biblia kag sang nakilala niya nga si Jehova ang ngalan sang Dios. Nabawtismuhan sia bilang isa sa mga Saksi ni Jehova sang 1998. Napangasawa niya si Olga sang 2015

Ang Iya Ginsiling

Ano nga teksto sa Biblia ang nakabulig sa imo nga mangin maisog kag makabatas?

Ang isa sa akon paborito nga teksto amo ang Genesis 15:1 . . . Indi ko gid malipatan ini nga teksto kay nagabalikbalik ini sa akon pensar sang gab-i nga nagkadto sa amon apartment ang mga FSB agent kag gindala nila ako para interogahon. . . . Nakabulig ini sa akon nga mangin kalmado kag magpadayon nga matutom.

Vladimir Atryakhin

Natawo: 1987 (Rozhdestveno, Republic of Mordovia)

Biograpiya: Ginpadaku sia sang iya nagasolo nga ginikanan. May manghod sia nga lalaki. Nanamian sia maghampang sang soccer, volleyball, kag hockey. Isa sia ka computer programmer. Nagaobra sia bilang systems administrator

Nangin interesado sia sa Biblia sang nagaeskwela pa sia. Nabawtismuhan sia bilang isa ka Saksi ni Jehova sang 2004. Napangasawa niya si Mariya sang 2009. May duha sila ka gagmay nga bata, ang isa siam pa lang ka bulan kag ang isa duha ka tuig sang gin-aresto sia

Ang Iya Ginsiling

Paano nangin mas mabakod ang imo relasyon kay Jehova sa sining tion sang kabudlayan?

Sang ginbulag ako sa akon pamilya, indi ako mahim-os kag naluyahan gid ako. Sang gindala ako sa detention center, ang isa sa mga nagatrabaho didto naga-fill up sang mga dokumento. Namangkot sia kon ngaa gin-detain ako. Siguro nasugid ko sa iya ang akon kabalaka [sa akon pamilya]. Sigurado gid sia sa iya ginsiling sa akon: “Indi pagpabay-an sang imo mga kaupdanan ang imo pamilya.” . . . Sigurado gid sia nga atipanon sang pareho ko nga mga Saksi ang akon pamilya . . . Nagapati ako nga gingamit ni Jehova ini nga guardia para pahanumdumon ako nga makasalig ako sa Iya. Sang nakagua ako sa detention center kag naistorya ko ang akon asawa, daw indi ako makapati kon paano gin-atipan sing maayo ni Jehova ang akon pamilya paagi sa pareho naton nga mga Saksi.

Aleksandr Korolev

Natawo: 1978 (Zemetchino, Penza Region)

Biograpiya: Nagdaku sia nga wala sing tatay. Sang bata pa sia nanamian sia magpangisda kag mag-soccer. Sang makatapos sia sa high school, nag-obra sia bilang drayber sang trak kag machinist. Nagbantay man sia sang mga karnero sa isa ka uma kag nagsagod sang mga sapat. Subong, nagaobra sia bilang panday kag woodworker

Sang nagtuon sia sa Biblia upod sa mga Saksi ni Jehova, nasabat ang mga pamangkot nga madugay na niya ginapaligban. Nabawtismuhan sia sang 1998. Sang 2006, napangasawa niya si Natalya, kag magkaupod nila nga ginpadaku ang bata nga lalaki ni Natalya

Ang Iya Ginsiling

Ano nga benepisyo ang padayon mo nga nabaton sa imo pagtambong sa mga miting kada semana?

Nakabulig gid sa akon ang nakaiskedyul nga pagbasa sa Biblia para sa midweek meeting. Kon pamensaron ko ang halimbawa sang mga alagad ni Jehova sang una, napalig-on ako sang ila kaisog kag pagtuo. Ang pag-aplikar sa mga suhestyon nga nabaton naton sa mga miting nakabulig sa akon nga magpakita sing kaayo sa iban. Ginapangamuyo ko gihapon nga buligan ako nga maggawi sing maayo para malikawan . . . nga mapakahuy-an ang ngalan ni Jehova.

Georgiy Nikulin

Natawo: 1963 (Rovenky, Ukraine)

Biograpiya: Nakatuon sia nga mangin drayber kag mekaniko. Maayo man sia sa graphic design, pag-repair sang satellite radio, pagmentinar sang kagamitan, kag wood carving

Nanamian gid sia magtuon kag maghibalo sang bag-o nga mga butang. Interesado gid sia sa ginhalinan sang tawo. Nasabat gid ang iya mga pamangkot sang nagtuon sia sing Biblia upod sa mga Saksi ni Jehova

Ang Iya Ginsiling

Ano ang nakabulig sa imo nga indi magluya ang imo pagtuo kag nakapabilin ka nga maisog samtang ara ka sa detention center?

Ang pagtuon sa Kasulatan kag pagpamalandong sa mga teksto sa Biblia nakabulig gid sa akon. Madamo sang halimbawa sang mga alagad ni Jehova sa Biblia nga nagpakita sang pagtuo kag kaisog. Nalipay gid ako nga ilugon sila.

Natun-an ta nga madamo gid sang ginhimo nga kabutigan si Satanas para paluyahon kita kag indi makabatas. Bal-an ta man nga indi kita dapat maluyahan kon ginapasibangdan kita, kundi dapat naton ini batunon kay amo gid man sini ang ginapaabot naton nga matabo sa aton.

Yelena Nikulina

Natawo: 1968 (Monastyrskoe, Republic of Mordovia)

Biograpiya: Nanamian sia sang cross-country skiing kag pagpanahi sang bata pa sia. Gani nag-eskwela sia para mangin sastre kag sang ulihi nagtuon sia sa pagpangtabas. Nagsaylo sia sa Saransk kag sa Tolyatti para magpangita sing obra. Nakaobra sia bilang sastre. Subong, pagpaninlo ang iya obra

Napamana niya si Georgiy sang 2016. Nagtuon sila sing Biblia. Natun-an nila nga nabatyagan gid sang Dios ang pag-antos sang mga tawo kag mahigugmaon sia. Nabawtismuhan sia bilang isa sa mga Saksi ni Jehova sang 2017

Ang Iya Ginsiling

Paano ka nakabenepisyo sa bulig sang mga kauturan?

Isa ka tuig sa tapos kami gin-raid [sang mga pulis], nasunog ang amon balay. . . . Nagdayaw gid ang amon mga paryente kay gin-atipan gid kami sang mga kauturan. Subong, ginaaplikar na nila ang ila natun-an sa Biblia kag [naga-uswag na sila sa ila pag-alagad].

Aleksandr Shevchuk

Natawo: 1989 (Pyatigorsk, Stavropol Territory)

Biograpiya: Gintun-an niya ang pagpang-landscape kag konstruksion. Sang ulihi nagsaylo sia sa Saransk. Nag-obra sia bilang manughimo sang furniture. Nanamian sia maghampang sing basketball kag table tennis

Ang iya lolo kag lola sa tuhod gintapok sa Siberia bangod mga Saksi ni Jehova sila. Gani ang iya mga ginikanan pareho nga natawo sa Siberia

Nabawtismuhan sia sang 2006. Nagpangindi sia nga magsoldado gani naghimo sia sang alternative civilian service

Ang Iya Ginsiling

Sa sulod sang apat ka bulan nga ara ka sa detention center, ano ang nakabulig sa imo nga maatubang ang kabudlayan?

Halin sang bata pa ako, magkaupod gid ang amon pamilya sa pagbasa sang adlaw-adlaw nga teksto antes sang pamahaw kada aga. Nangin bahin gid ini sang akon kabuhi kag gintinguhaan ko nga himuon ini bisan ara ako sa prisuhan. Sang umpisa, sang wala pa ako sang Biblia, ginpanumdom ko ang pila ka teksto ukon ang halimbawa sang pila ka alagad ni Jehova kag ginpamalandungan ini. Ang una nga teksto nga nadumduman ko amo ang Isaias 40:26-31. Isa ini sa paborito ko nga mga teksto. Nakabulig ini sa akon nga indi gid pagkalimtan nga si Jehova ang Manunuga, kag may daku gid sia nga gahom. Ginagamit niya ina nga gahom para pabakuron kita nga mga tawo sa mabudlay nga mga kahimtangan.

Sigurado kita nga padayon nga ipakita ni Jehova ang iya mainunungon nga gugma kag katutom sa aton palangga nga mga kauturan nga ginahingabot sa Russia samtang padayon sila nga nagasalig sa Iya.—Genesis 32:10.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE