DISIEMBRE 20, 2021
RUSSIA

UPDATE | Apat ka Brother ang Nagahulat sang Desisyon sang Korte Pagkatapos sang Pinakamadamo nga Pagpang-raid sang mga Balay sa Trans-Baikal Territory

I-PLAY

Sang Septiembre 20, 2022, gin-deny sang Trans-Baikal Territory Court ang pag-apelar nanday Brother Vladimir Ermolaev, Brother Sergey Kirilyuk, Brother Igor Mamalimov, kag Brother Aleksandr Putintsev. Sanday Vladimir, Igor, kag Aleksandr ginapriso gihapon. Indi kinahanglan nga prisuhon si Sergey sa sini nga tion.

Sang Hunyo 6, 2022, nagdesisyon ang Central District Court of Chita nga gulity sanday Vladimir, Sergey, Igor, kag Aleksandr. Si Sergey ginsentensiahan sang anom ka tuig nga suspended prison. Si Vladimir, si Igor, kag si Aleksandr naman ginsentensiahan sing anom ka tuig kag tunga nga pagkapriso. Gilayon sila nga gindala para prisuhon.

Time Line

Marso 16, 2021

Nagsugod ang pag-hearing sa sini nga kaso
Pebrero 2, 2021

Sanday Vladimir, Sergey, Igor, kag Aleksandr gin-akusar nga nagaorganisar sang mga hilikuton sang isa ka gin-ban nga organisasyon
Abril 3, 2020

Gintapos ang pag-house arrest kay Vladimir
Pebrero 15, 2020

Ginpagua si Sergey pagkatapos sang lima ka adlaw nga pag-detain
Pebrero 12, 2020

Ginpagua sanday Igor kag Aleksandr. Gindugangan sing 72 ka oras ang pag-detain kay Sergey. Si Vladimir ginsentensiahan sang 52 ka adlaw nga house arrest
Pebrero 10, 2020

Gin-raid sang mga FSB agent ang 50 ka balay sang mga Saksi ni Jehova sa Trans-Baikal Territory. Nalakip sa gin-raid ang mga balay sang mga tigulang kag dis-ebol nga mga Saksi. Sa isa ka pamilya, ginkastigo ang isa ka menor-de-edad nga Saksi sa atubang sang iya nanay kag manghod nga babayi. May isa pa ka brother nga gin-torture. Sang matapos ang pagpang-raid, gin-detain sang mga agent ang pulo ka brother pati sanday Igor, Aleksandr, Sergey, kag Vladimir

Impormasyon Parte sa Ila

Sergey Kirilyuk

Natawo: 1972 (Cheremkhovo, Irkutsk Region)

Biograpiya: Daku ang iya pamilya kag anom sila nga kabataan. Nagaobra sia bilang welder. Napangasawa niya si Olga sang 1992. May tatlo sila ka kabataan

Si Sergey kag si Olga nangin interesado sa Biblia sang dekada ’90. Nabawtismuhan sia sang 1998

Ang Iya Ginsiling

Ano ang epekto sa iban sang imo paggawi sa detention center?

Ginbutang ako sa isa ka selda upod sa tawo nga pirme lang nagakapriso. Gua-sulod sia sa prisuhan sugod sang hamtong na sia. . . . Kada magbalik ako sa selda pagkatapos ako interogahon, ginapamangkot niya ako: “Ti, may nakuha sila nga impormasyon sa imo?” kag nagasabat ako: “Wala.” Ginarespeto niya ako. Ginainterogar ako [sang mga awtoridad] sa bilog nga adlaw kag wala nila ako ginahatagan sing pagkaon. Pero pagbalik ko sa selda may pagkaon ako kay ginasakop ako sang akon upod sa selda. Wala ako nagakagutman.

Igor Mamalimov

Natawo: 1976 (Ilishevsky District, Republic of Bashkortostan)

Biograpiya: Nagdaku sia sa isa ka malapad nga uma kag may duha sia ka utod. Kabalo sia magtokar sang accordion. Nagaobra sia subong part-time nga mason kag mekaniko. Napangasawa niya si Natalya sang 2007. May tatlo sila ka kabataan

Sang mga tuig 2000, nagmasakit sia kag napatay man ang iya manghod nga babayi. Bangod sini madamo sia sing pamangkot parte sa Dios, sa kabuhi, kag sa kamatayon. Nakita niya ang sabat sa sini sang nagtuon sia sa Biblia upod sa mga Saksi ni Jehova. Nabawtismuhan sia sang 2008

Ang Iya Ginsiling

Paano mas nga nagsuod kay Jehova ang imo pamilya sang naagyan ninyo ini nga kabudlayan?

Nagsuod pa gid ang amon pamilya kag mas nagsuod man kami kay Jehova. Nagbakod ang relasyon sang akon mga bata kay Jehova. Palangga gid nila si Jehova. . . . Pirme man sila nagakomento sa mga miting, kag madamo sila sing pamangkot. . . . Pirme man sila nagapangamuyo kay Jehova kag ginasugid nila sa amon kon paano niya ginasabat ang ila mga pangamuyo. Ini nga kabudlayan may daku nga epekto sa amon kabuhi, kag ang tanan sa amon pamilya may natun-an gid nga maayo nga mga butang sa sini nga eksperiensia.

Aleksandr Putintsev

Natawo: 1974 (Verkhnyaya Khila, Trans-Baikal Territory)

Biograpiya: Bugtong sia nga bata. Nanamian sia magbasa kag mahilig sia sa photography. Napangasawa niya si Galina sang 1994. May kaugalingon sila nga negosyo kag may isa sila ka bata

Sang mga 1990, narealisar niya nga indi na gid maayo ang epekto sa iya pamilya sang iya pagpahubog. Nagbag-o ang iya kabuhi sang nagtuon sia sa Biblia kag sang gin-aplikar niya ang iya natun-an. Nabawtismuhan sia sang 1997

Ang Iya Ginsiling

Paano ka nabuligan sang imo pagpangamuyo?

Grabe gid nga pagtilaw sa akon pagtuo ang una nga pag-interogar sa akon. Ginanerbios gid ako amo nga nagalalain gid ako. Nagpangamuyo ako pirme. Nabal-an ko man nga ang akon mga abyan kag mga kapamilya nagapangamuyo para sa akon. Nadumduman ko man nga wala untat ang akon pagpangamuyo sang gindala ako para interogahon. Pag-abot ko sa opisina sang imbestigador, kalmado na ako kag nabatyagan ko gid ang bulig ni Jehova. Sa sunodsunod nga pag-interogar sa akon, may kompiansa na ako nga indi gid ako pagpabay-an ni Jehova.

Kabay pa nga sundon naton ang mabakod nga pagtuo sang aton pinalangga nga mga kauturan. Pareho kay Daniel kag sa iya tatlo ka kaupdanan, ‘nagdesisyon sila’ nga padayon nga mangin mainunungon kay Jehova bisan sa paghingabot sang mga awtoridad.—Daniel 1:8.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE