Sang Hunyo 3, 2022, nagdesisyon ang Pervomayskiy District Court of Kirov nga guilty sanday Brother Maksim Khalturin, Brother Vladimir Korobeynikov, Brother Andrzej Oniszczuk, Brother Andrey Suvorkov, Brother Yevgeniy Suvorkov, kag Brother Vladimir Vasilyev. Ini nga mga brother ginsentensiahan sang sarisari nga kalawigon sang suspended prison halin sa duha ka tuig kag tunga asta sa anom ka tuig kag tunga. Nagdesisyon man ang korte nga guilty si Brother Yuriy Geraskov bisan pa nga napatay na sia antes pa natapos ang kaso.

Yuriy Geraskov

• Natawo: 1956 (Azerbaijan)

• Napatay: Abril 24, 2020

• Biograpiya: Mahilig sia maghampang sing soccer kag nanamian man sia sa photography. Nagtrabaho sia sa isa ka daku nga orkestra. Nagsaylo sia sa Russia sang 1993 bangod sa kinagamo sa pulitika sa Azerbaijan. Napangasawa niya si Alevtina sang 2011. Sa sina man nga tuig, nabawtismuhan sia bilang isa sa mga Saksi ni Jehova. Nanamian sila nga mag-asawa nga maglakatlakat para mag-istoryahanay kag magbisita sa ila mga abyan

Maksim Khalturin

• Natawo: 1974 (Kirov, Kirov Region)

• Biograpiya: Bata pa lang sia mahilig na sia magbasa. Nangin interesado sia sa Biblia sang 1993. Nabawtismuhan sia bilang isa sa mga Saksi ni Jehova sang 1995. Ginaatipan niya ang iya tigulang na nga mga ginikanan. Bisan pa indi sila mga Saksi, ginarespeto nila ang pagpati ni Maksim

Vladimir Korobeynikov

• Natawo: 1952 (Dikson Island, Krasnoyarsk Territory)

• Biograpiya: Ang iya amay isa ka scientist kag ginatun-an sini ang arctic ocean. Sang bata pa si Vladimir mahilig sia maghimo sang replica sang isa ka butang. Nagtrabaho sia bilang plumber kag machinist. Retirado na sia subong kag nanamian sia mangisda

  Sang dekada ’90, nagtuon sila sang iya asawa nga si Olga sing Biblia upod sa mga Saksi ni Jehova. Nagdayaw gid sia sa mga tagna sa Biblia. Nabawtismuhan sia sang 1996. May duha sila ka bata, isa ka lalaki kag isa ka babayi. Mga adulto na subong ang iya duha ka bata. Ang mga prinsipio sa Biblia, nakabulig gid sa ila pamilya nga mangin mabakod

Andrzej Oniszczuk

• Natawo: 1968 (Białystok, Poland)

• Biograpiya: Sang bata sia, mahilig sia maghampang sing soccer kag sa weight lifting. Nabawtismuhan sia sang 1990. Nagsaylo sia sa Kirov sang 1997. Nanamian gid sia sang mga libro sang Russia. Napangasawa niya si Anna sang 2002. Nanamian sila maglagawlagaw, mangita sing uhong, kag maghampang sing soccer

Andrey Suvorkov

• Natawo: 1993 (Kirov, Kirov Region)

• Biograpiya: Halin sang lapsag pa sia, gintudluan na sia sang iya iloy sing mga kamatuoran sa Biblia. Sang bata sia, mahilig sia magtuon parte sa science kag maghampang sing sports, ilabi na sang volleyball. Nabawtismuhan sia bilang isa sa mga Saksi ni Jehova sang 2007. Kag bangod nangindi sia nga magsoldado, ginpaobra sia sa isa ka drug-abuse treatment center. Napangasawa niya si Svetlana sang 2016. Mahilig sila nga mag-asawa sa sports

Yevgeniy Suvorkov

• Natawo: 1978 (Kumeny, Kirov Region)

• Biograpiya: Sang bata sia, mahilig sia maghampang sing chess kag hockey kag mamati sing music. Isa sia ka elektrisyan. Sang 16 anyos sia, nagtuon sia sing Biblia sa mga Saksi ni Jehova. Nabawtismuhan sia sang 1995. Sang 18 anyos isa, nangindi sia nga magsoldado sang ginpatawag sia sang gobierno, kag nangabay nga maghimo na lang sing alternative service. Anom ka beses nga gin-hearing ang iya pangabay kag pagkatapos sini, ginpasugtan ang iya pangabay. Napangasawa niya si Svetlana sang 2000 kag ginpadaku nila nga mag-asawa ang bata ni Svetlana nga si Andrey (nga ginsambit kaina)

Vladimir Vasilyev

• Natawo: 1956 (Perm)

• Biograpiya: Sang bata sia, mahilig sia maghampang sing soccer. Nagtrabaho sia bilang plumber kag drayber. Retirado na sia subong. Sang mga dekada ’90, nagtuon sila sang iya asawa nga si Nadezhda sing Biblia upod sa mga Saksi ni Jehova. Nabawtismuhan sia sang 1994

Sang Oktubre 9, 2018, gin-raid sang mga awtoridad ang 14 ka balay sang mga Saksi ni Jehova sa Kirov. Bangod sini, gin-detain sanday Brother Maksim Khalturin, Brother Vladimir Korobeynikov, Brother Andrzej Oniszczuk, Brother Andrey Suvorkov, kag Brother Yevgeniy Suvorkov. Pagkatapos sina, gindala sila sa pretrial detention center. Sang Enero kag Hulyo 2019, ginkasuhan man si Brother Vladimir Vasilyev kag si Brother Yuriy Geraskov.

Gin-detain si Vladimir Korobeynikov sing sobra duha ka bulan. Pero ginpagua sia para i-house arrest na lang para maatipan niya ang iya bata nga babayi kag nagamasakit nga asawa. Si Maksim kag si Andrey ginbutang sa detention center sing sobra tatlo ka bulan. Si Yevgeniy sing sobra lima ka bulan. Si Andrzej ginbutang sa detention center sing 327 ka adlaw. Ang pila sa ila ginpagua na pero gin-house arrest. Subong, nakagua na sila tanan, pero gindumilian sila nga magbiyahe sa iban nga lugar.

Nabudlayan gid ini nga mga brother sang ara sila sa detention facility ilabi na kay layo sila sa ila pamilya. Pero nagasalig sila nga atipanon ni Jehova ang ila mga pamilya.

Halimbawa, dis-ebol ang asawa ni Vladimir Korobeynikov nga si Olga. Nagsiling sia: “Kon pamensaron ko nga ang akon na lang asawa ang nabilin sa amon balay, nagalalain gid ako.” Nagsiling pa sia nga ginkuha ang cell phone sang iya asawa sang gin-raid ang ila balay. Pirme gid ini ginapaligban ni Vladimir. Pero naumpawan gid sia sang nakabaton sia sing sulat halin sa isa ka sister kag ginpasalig sia nga wala ginapabay-an sang mga kauturan ang iya asawa. Kag nalipay gid sia sang ginsulatan sia ni Olga kag ginsilingan nga wala sia sing dapat kabalak-an kay okay lang sia.

Bangod gin-akusar sila nga mga “extremist” indi sila makahalin sa ila lugar. Nabudlayan man sila mangita sing trabaho. Dugang pa, indi nila makuha ang ila kuarta sa banko.

Pero, si Yevgeniy nagsiling: “Ginhatagan kami ni Jehova sang tanan namon nga kinahanglanon. Pareho sa mga Israelinhon sa kamingawan, wala gid kami ginkulang. Naeksperiensiahan mismo namon ang pagbulig sang mga kauturan. Ginbuligan nila kami sa amon mga kinahanglanon, ginpaumpawan kami, kag ginbuligan nila kami nga padayon nga mangin suod kay Jehova.”

Para sa sini nga mga brother, ang pagpangamuyo, personal nga pagtuon, kag pagbasa sing Biblia amo ang nakabulig sa ila nga mangin matutom kag mabakod. Halimbawa, si Vladimir Vasilyev nagsiling: “May mga hitabo nga ginasugid ang Biblia. Sang nabasa namon ini, napalig-on gid kami kay kabalo kami nga kontrolado ni Jehova ang tanan. Bangod sini, nagbakod pa gid ang amon pagtuo sa Dios, kag mas nagsalig pa gid kami sa iya.”

Nagbudlay gid ang kabuhi sang aton mga brother kag sang ila mga pamilya bangod sini nga kaso. Pero kabalo kita nga indi gid sini mapaluya ang ila pagsalig kay Jehova. Padayon sila nga nagabatas kay kabalo sila nga temporaryo lang ang halit nga mahimo sang “tawo” sa ila.—Salmo 56:4.