Yevgeniy Yegorov

• Natawo: 1991 (Birobidzhan)

• Biograpiya: Ginpadaku sia sang iya iloy kag sang iya lola. Nag-eskwela sia sing electrical engineering. Nagahimo sia kag nagapangkay-o sang mga kandado kag sang iban pa nga butang. Nanamian sia magbasa kag magsulat. Awtor sia sang isa ka nobela kag nagasulat man sia sang mga binalaybay. Nabawtismuhan sia bilang isa sa mga Saksi ni Jehova sang 2005. Napangasawa niya si Kseniya sang Septiembre 2019. Nabun-ag ang ila bata nga lalaki sang Agosto 2020

Sang Mayo 2018, gin-raid sang mga agent sang Federal Security Service (FSB) ang madamo nga balay sa Birobidzhan. Antes sang kasal ni Yevgeniy, ginkasuhan sia sing “mga krimen” bangod naghimo sia sang mga hilikuton sang iya relihion kag sang iya pagbasa sing Biblia. Gindumilian sia nga magbiyahe. Pagkatapos sang kasal ni Yevgeniy, ginkasuhan man ang iya iloy nga si Larisa Artamonova. Sang Disiembre 2019, ginsugdan ang pag-hearing sang ila kaso sa Birobidzhan District Court.

Nagsiling si Yevgeniy nga mas nagsuod pa gid sia kay Jehova. Nagsiling sia: “Sang ara ako sa mabudlay nga sitwasyon, ginbuligan ako ni Jehova nga mangin kalmado kag ginhatagan niya ako sing ‘gahom nga labaw sa kinaandan.’”—2 Corinto 4:7.

Kabalo si Yevgeniy nga buligan sia ni Jehova. Pero bisan pa sini, dapat niya gihapon ihanda ang iya hunahuna kag balatyagon, kag dapat padayon sia nga mangin malapit kay Jehova. Nagsiling sia: “Para sa akon bisan ano man ang akon sitwasyon, dapat mangin panguna sa akon kabuhi ang akon relasyon kay Jehova.”

Bisan pa sang mabudlay nga sitwasyon nga naeksperiensiahan ni Yevgeniy kag ni Kseniya, kag sang mga kauturan sa Russia, nagasalig kita nga mapabakod gid sila sa ginsiling sang Salmo 10:17: “Apang pamatian mo ang pangabay sang mahagop, O Jehova. Palig-unon mo ang ila tagipusuon kag pamatian sila.”