ENERO 31, 2022 | GIN-UPDATE: Marso 27, 2023
RUSSIA

UPDATE | GINBUHINAN ANG SENTENSIA | Si Sister Lyudmila Salikova Ginapabakod kag Ginalugpayan ni Jehova

I-PLAY

Sang Marso 23, 2023, ginpahibalo sang Chelyabinsk Regional Court ang desisyon sini sa ikaduha nga pag-apelar ni Sister Lyudmila Salikova. Ginbuhinan sang korte ang iya suspended prison sentence nga anom ka tuig kag ginhimo na lang ini nga duha ka tuig kag tunga. Indi niya kinahanglan nga mapriso sa sini nga tion.

Sang Marso 17, 2022, gin-dismiss sang Chelyabinsk Regional Court ang pag-apelar ni Lyudmila.

Sang Enero 20, 2022, ang Snezhinsk City Court of the Chelyabinsk Region nagdesisyon nga guilty si Lyudmila kag ginsentensiahan sia sing anom ka tuig nga suspended prison.

Time Line

Nobiembre 2020

Gin-raid sang security forces sa Snezhinsk ang mga balay sang apat ka pamilya sang mga Saksi ni Jehova, lakip ang balay ni Lyudmila. Gin-raid man sang mga agent ang iya ginaubrahan. Sang ulihi, ginpauntat sia sa iya obra
Agosto 26, 2021

Ginpasakaan sing kaso si Lyudmila kay gin-akusar sia nga naga-organisar sang mga miting sang gin-ban nga relihion kag naga-import sang gin-ban nga literatura
Disiembre 8, 2021

Ginsugdan ang pag-hearing sa iya

Impormasyon Parte sa Iya

Lyudmila Salikova

Natawo: 1951 (Sysert)

Biograpiya: Namana sia sang 1971. May tatlo sila ka bata nga lalaki. Napatay ang iya bana sang 2009. Nag-obra sia bilang energy engineer sa siudad sang Snezhinsk. Nanamian sia magbiyahe

Ang iya magulang nga babayi nagsugod sa pagtuon sa Biblia sang 1999. Anom ka bulan sang ulihi, nag-upod si Lyudmila sa iya pagtuon. Naathagan sia kon ano ang kahulugan sang kabuhi kag kon ngaa grabe gid ang inhustisya, kapintas, kag inaway. Nabawtismuhan sia sang 2002

Ang Iya Ginsiling

Paano mas nga nagbakod ang imo relasyon kay Jehova bangod sa sining mga kabudlayan nga imo naeksperiensiahan?

Antes sini, pamatyag ko pirme lang sala ang akon ginahimo kag daw wala ako ginapabaloran ni Jehova . . . Pero subong nagbag-o na ang akon panghunahuna, kag nagapati na ako nga importante na ako para kay Jehova. Ginhatagan man ako ni Jehova sing pribilehiyo nga pakabalaanon ang iya ngalan diri sa Snezhinsk. Gani subong, sigurado na gid ako nga palangga ako kag ginasaligan ni Jehova. Para sa akon, ang tanan nga sitwasyon nga ginatugutan ni Jehova nga matabo, kahigayunan ko nga pamatud-an nga masaligan niya ako.

May ginhambal bala ang isa ka utod sa imo nga nakabulig sa imo nga makabatas?

Antes sang una nga hearing, puerte gid ang akon kabalaka . . . Nangamuyo ako: “. . . Palihug hatagi ako sang imo balaan nga espiritu. Nagapakitluoy ako sa imo, Jehova!” Dugaydugay, nakabaton ako sang text halin sa isa ka sister. Ini nagasiling: “. . . Ang isa ka pagtilaw sa pagtuo daw pareho sa washing machine. ‘Ginapatiyog kita sini, ginabulubaliswa, ginalubag, kag ginapuga.’ Pero pareho sa washing machine nga makatinlo sang mga bayo, ang isa ka pagtilaw makapatinlo man sa aton. ‘Daw ginpuga ka kag ginlubag’ bangod sang tanan nga pag-raid, interogasyon, kag imbestigasyon nga naagyan mo. Pero, ini nga mga kabalaka kag mga kabudlayan nagpatahom pa gid sa imo sa panan-aw ni Jehova kag sa amon man . . . Sigurado kami nga buas sa aga, ara ka sa korte pero mabatyagan mo man ang gugma kag proteksion ni Jehova.” Kabalo gid si Jehova sang akon ginabatyag, gani gingamit niya ang akon pinalangga nga sister para ipahibalo sa akon nga palangga niya ako.

Ang aton mga kauturan sa Russia padayon nga ginapabakod kag ginalugpayan ni Jehova. Ginapasalig kita sang aton mahigugmaon nga Dios nga “hatagan [niya] sing hustisya ang mga wala sing amay kag nalisdan, agod indi na sila mahadlok sa mamalatyon nga tawo sa duta.”—Salmo 10:18.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE