DISIEMBRE 27, 2022| GIN-UPDATE: MARSO 27, 2023
RUSSIA

UPDATE—GINMULTAHAN | “Kon May mga Kabudlayan, Ginapabakod Kita ni Jehova”

I-PLAY

Sang Marso 23, 2023, nagdesisyon ang Apatity City Court of the Murmansk Region nga guilty si Brother Denis Merkulov. Ginmultahan sia sang 500,000 rubles ($6,485.00 U.S.).

Impormasyon Parte sa Iya

Denis Merkulov

Natawo: 1976 (Kirovsk, Murmansk Region)

Biograpiya: Nagaobra sia bilang welder kag electrician

Nabalaka sia bangod nabal-an niya nga wala sing tawo nga indi mapatay. Nalipay sia sang nabal-an niya ang katuyuan sang Dios para sa mga tawo sang nagtuon sia upod sa mga Saksi ni Jehova. Nabawtismuhan sia sang 1995. Napangasawa niya si Nataliya sang 1998

Ang Iya Ginsiling

Sa sini nga eksperiensia, ano ang natun-an mo parte sa imo kaugalingon?

Natun-an ko nga indi bangod may mga pagtilaw, mangin maayo na ako nga tawo. Ang pagsalig kay Jehova kada adlaw amo ang nakabulig sa akon nga makabatas. Pirme ko ginapamangkot ang akon kaugalingon: ‘Daw ano gid kadaku ang akon pagsalig kay Jehova kon nagahimo ako sang mga goal ukon desisyon adlaw-adlaw? Daw ano kadamo nga tion ang akon ginagamit para sa pagbasa sang Biblia, paghanda sa mga miting, kag pagbantala sang maayong balita sa iban?’ Gani kon may matabo nga pareho sini nga nagapabag-o gid sang kabuhi, makabatas lang ako kag mangin kalmado kon mabakod ang akon pagtuo kag may maayo nga relasyon kay Jehova.

May teksto bala sa Biblia nga nakabulig gid sa imo?

Ginbinagbinag namon sang akon asawa ang Isaias 41:10 sang gab-i antes ako gin-aresto. Nagasiling ini: “Indi ka mahadlok, kay kaupod mo ako. Indi ka magkabalaka, kay ako imo Dios. Pabaskugon ko ikaw, huo, buligan ko ikaw, uyatan ko ikaw sang akon tuo nga kamot sang pagkamatarong.” Sang ginbutang ako sa temporary detention pagkasunod nga adlaw, ginasulitsulit ko ini sa akon hunahuna. Nagadulog ako sa kada sentence kag ginapamalandungan ko ang kada tinaga. Sina nga tion, pamatyag ko ako mismo ang ginahambalan ni Jehova sina nga mga tinaga. Narealisar ko nga ginatugutan ni Jehova nga maeksperiensiahan naton ang mga kabudlayan indi bangod mabakod kita, kundi kon may mga kabudlayan ginapabakod kita ni Jehova.

Napaumpawan gid kita bangod bisan ano man nga kabudlayan ang aton maatubang, ang aton relasyon kay Jehova kag ang aton pagsalig sa iya magapahulag sa iya nga ‘pabaskugon kag pabakuron kita.’—1 Pedro 5:10.

Time Line

Hulyo 21, 2021

Gin-raid sang mga pulis ang 14 ka balay sang mga Saksi ni Jehova sa Apatity kag sa mga lugar sa palibot sini. Puersa nga ginsulod sang mga FSB agent ang apartment sang mga Merkulov kag gin-detain nila ang mag-asawa para interogahon. Gin-release sila mga alas 4:00 na sang aga sa sunod nga adlaw
Hulyo 22, 2021

Ginpabalik sang mga opisyal si Denis sa opisina sang imbestigador. Ginbutang sia sa temporary detention
Hulyo 23, 2021

Ginpagua sia pero gin-house arrest gihapon
Septiembre 17, 2021

Gintapos ang pag-house arrest sa iya pero ginbutangan sing restriksion ang iya pagbiyahe
Hulyo 15, 2022

Ginkasuhan sia nga nagaorganisar sang mga hilikuton sang isa ka extremist nga organisasyon kay “nagakanta sia” kag “nagapangamuyo kay Jehova nga Dios”
Septiembre 20, 2022

Ginsugdan ang hearing

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE