PEBRERO 3, 2022 | GIN-UPDATE: HULYO 20, 2023
RUSSIA

UPDATE—GINPAGUA ANG BROTHER | Ang Adlaw-adlaw nga Pagbasa sang Biblia kag ang Pagpamalandong Nakabulig kay Brother Aleksey Ukhov nga Magsalig kay Jehova

I-PLAY

Sang Hulyo 18, 2023, ginbag-o sang Khabarovsk Territory Court ang anom ka tuig kag tunga nga sentensia nga ginhatag nila sang nagligad kay Brother Aleksey Ukhov. Ginsentensiahan sia subong sang anom ka tuig kag tunga nga suspended prison. Ginpagua sia dayon sa tapos mapahibalo ang desisyon.

Sang Marso 24, 2023, nagdesisyon ang Sovetsko-Gavansky City Court of the Khabarovsk Territory nga guilty si Aleksey kag ginsentensiahan sia nga mapriso sing anom ka tuig kag tunga. Halin sa korte, gindala sia dayon sa prisuhan.

Time Line

Oktubre 22, 2020

Gin-raid sang mga agent sang FSB ang balay sang mga Ukhov. Ginkumpiskar ang mga gadyet, flash drive, SIM card, bank card, personal nga mga rekord, kag ang naimprinta nga mga publikasyon. Ginbutang sia sang mga imbestigador sa temporary detention center
Oktubre 23, 2020

Nagmando ang korte nga ibutang sia sa pretrial detention center
Hulyo 9, 2021

Ginhilway sia kag ginmanduan nga indi maggua sa lugar sang Komsomolsk-on-Amur, diin sia gin-detain
Septiembre 6, 2021

Ginsugdan ang pag-hearing

Impormasyon Parte sa Iya

Aleksey Ukhov

Natawo: 1980 (Lososina)

Biograpiya: Aktibo sia sa demonismo sang pamatan-on sia. Pagkatapos makatuon sing Biblia upod sa mga Saksi ni Jehova sang tin-edyer sia, damo sia sing ginbag-o sa iya kabuhi. Nabawtismuhan sia sang 1996. Napangasawa niya si Liliya sang 2003

Ang Iya Ginsiling

Ano ang nakabulig sa imo nga mangin malipayon gihapon sang ara ka sa detention?

Nakabulig sa akon ang regular nga pagbasa sang Biblia kag ang pagpamalandong. Sang may bolpen na ako kag papel, naghimo ako sang notebook kag ginasulatan ko sang makawiwili nga mga punto sa kada kapitulo sang Biblia nga nabasa ko. . . . Sang ara ako sa detention nabasa ko ang bilog nga Biblia kag ginbasa ko ini liwat asta nga nakalab-ot ako sa libro ni Oseas. Nakabulig sa akon nga indi matak-an sa sulod sang prisuhan ang pagbasa kag pagpamalandong.

Paano ang imo eksperiensia sa detention center mas nga nagpabakod sang imo pagsalig kay Jehova?

Nag-abot ang tion nga nangin maathag sa akon nga antes ako napriso, nagasalig ako sa akon kaugalingon kag sa akon kusog. . . . Adlaw-adlaw, pirme ako sigurado nga masolusyunan ko ang tanan nga butang. Kon may maguba, kay-uhon ko. Kon may kinahanglan ako, mabakal ako. . . . Pero subong, bangod sa akon bag-o nga sitwasyon, wala ako sing mahimo para solusyonan ang akon mga problema. Naintiendihan ko nga ang pagpakita sang pagsalig nagakahulugan sang pagtugyan sang tanan kay Jehova.

Nahibaluan naton nga si Jehova magapadayon sa pagpadya kay Aleksey kay “ginsalig niya ang iya kaugalingon sa Isa nga nagahukom sing matarong.”—1 Pedro 2:23.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE