PEBRERO 10, 2023 | GIN-UPDATE: HULYO 14, 2023
RUSSIA

UPDATE—GINPRISO ANG MGA BROTHER | Tatlo ka Brother ang Gina-hearing sa Court of Moscow

I-PLAY

Sang Hulyo 12, 2023, nagdesisyon ang Savelovskiy District Court of Moscow nga guilty sanday Brother Roman Mareyev, Brother Anatoliy Marunov, kag Brother Sergey Tolokonnikov. Si Roman ginsentensiahan nga mapriso sing apat ka tuig kag anom ka bulan. Si Anatoliy ginsentensiahan nga mapriso sing anom ka tuig kag anom ka bulan, kag si Sergey ginsentensiahan nga mapriso sing lima ka tuig. Si Anatoliy gindala dayon sa prisuhan halin sa korte. Si Roman kag si Sergey ara na nga daan sa prisuhan.

Impormasyon Parte sa Ila

Roman Mareyev

Natawo: 1978 (Moscow)

Biograpiya: Nag-obra sia sa Moscow transport system. Sia ang nagaatipan sa iya dis-ebol nga mga ginikanan antes sia ginbutang sa detention center

Sang nagbasa sia sang Biblia nagdayaw sia kay insakto gid nga natuman ang mga tagna ni Daniel. Nabawtismuhan sia bilang isa sa mga Saksi ni Jehova sang 2002

Ang Iya Ginsiling

Ano ang nakabulig sa imo nga indi maluyahan sang buot bisan pa gin-detain ka sing malawig?

Sang gin-detain ako bangod sang akon pagtuo sa Dios, narealisar ko nga ang pinakamaayo nga paagi nga madayaw ko sia amo ang akon paggawi. Pila ka bulan nga naobserbahan sang akon mga upod sa prisuhan kon paano ko sila ginatratar. Gani importante gid nga pangayuon ko ang bulig ni Jehova kada adlaw paagi sa iya balaan nga espiritu para mapakita ko ang iya mga kinaiya.

Natun-an ko nga sobra gali ang akon kabalaka parte sa akon maagyan nga pagtilaw sangsa kabudlayan nga naagyan ko diri. Una nagasalig kita sa Dios, dayon ginauyatan niya kita sa kamot samtang nagaagi sa “madulom nga nalupyakan.” (Salmo 23:4) Ang dapat ko lang himuon amo nga indi pagbuy-an ang kamot sang Dios. Pirme gid ginapabakod ni Jehova ang akon paglaum, kag amo ’na ang rason kon ngaa malinong gihapon ang akon hunahuna kag malipayon ako.

Anatoliy Marunov

Natawo: 1953 (Izmail, Ukraine)

Biograpiya: Nag-obra sia bilang graphic designer sa isa ka kompanya sang newspaper antes sia mag-retire

Napangasawa niya si Alevtina sang 1975. May duha sila ka bata nga lalaki

Nag-Bible study si Alevtina kag nabawtismuhan sang 1994. Bangod nakaobra si Anatoliy sa isa ka kompanya sang newspaper, nagdayaw gid sia sa kalidad sang pag-imprinta sang mga Saksi ni Jehova. Nangin interesado sia sa mga tagna sa Biblia kag nabawtismuhan sang 1999

Ang Iya Ginsiling

Paano mo ginhandaan ang paghingabot?

Bal-an namon nga mag-asawa nga posible hingabuton man kami. Gani gintun-an gid namon sing maayo ang tanan nga daily text kag ang tanan nga artikulo, kag ginapamatian gid namon sing maayo ang tanan nga ginahambal sa mga miting sa kongregasyon, pati ang mga pahibalo. Nagapamati gid kami sa mga direksion sa kongregasyon kag ginasunod ini sing maayo.

Ano ang nakabulig sa imo nga makabatas?

Ang pagpasalamat sa ginhimo sang aton mahigugmaon nga Amay sa langit sa akon kag sa akon pamilya nakabulig sa akon nga makabatas. Kag nagapasalamat gid ako sa ginpromisa ni Jehova nga maayo nga palaabuton sa tanan nga nagatuman sa iya. Bal-an ta nga malapit na gid ang katapusan. Wala gid sang rason nga mag-untat ako subong sa pag-alagad, ilabi na kon pamensaron ko ang tanan nga bulig nga akon nabaton.

Sergey Tolokonnikov

Natawo: 1972 (Moscow)

Biograpiya: Nag-obra sia sa security

Napangasawa niya si Mariya sang 2004. Nagpa-Bible study si Mariya sang 2003. Nalipay si Sergey nga nasabat sang Biblia ang iya mga pamangkot kag nagpa-Bible study man sia. Dungan sila nga nabawtismuhan sang 2005

Ang Ginsiling sang Iya Asawa nga si Sister Mariya Pankova a

Paano kamo nagakontakanay sang imo bana?

Nagasulatay kami pirme. Ginalakip niya sa iya sulat ang sarisari nga mga teksto kag mga kasaysayan sa Biblia. Kag nagapadala man sia sang mga kard kag mga drowing nga nagapayuhum sa akon. Sining karon lang, ginpasugtan ako nga mabisitahan sia sing 1 ka oras kag tunga, duha ka beses kada bulan. Mga tatlo ka oras ang biyahe pakadto pa lang sa detention center, gani isa gid ka adlaw ang kinahanglan para mabisitahan ko sia.

Ano ang natun-an mo sa sini nga eksperiensia?

Natun-an namon ni Sergey nga wala sing mahimo ang mga piskal, mga judge, mga imbestigador, ukon ang bisan sin-o kon indi sila pagtugutan ni Jehova. Kontrolado gid ni Jehova ang tanan.

Nagapasalamat gid kita sa maayo nga halimbawa sang pagtuo ni Roman, ni Anatoliy, kag ni Sergey. Kag nagasalig kita nga bisan ano man kabudlay nga sitwasyon ang aton ginaatubang, ‘wala kita nahadlok’ kay kaupod naton si Jehova.—Salmo 23:4.

Time Line

Oktubre 20, 2021

Gin-raid sang mga awtoridad ang walo ka balay sang mga Saksi ni Jehova sa bilog nga Moscow. Ginsugdan ang kaso batok kanday Roman, Anatoliy, kag Sergey. Gin-akusar sila nga nagaorganisar sang mga hilikuton sang isa ka extremist nga organisasyon kag nagakumbinsi sa iban nga mag-entra sa sini. Ining tatlo ka brother ginbutang sa temporary detention
Oktubre 22, 2021

Si Roman kag si Sergey ginbutang sa pretrial detention. Si Anatoliy gin-house arrest
Hunyo 17, 2022

Ginsugdan ang hearing

a Samtang ginahanda ini nga artikulo, si Brother Tolokonnikov ara sa pretrial detention kag wala sia mainterbyu. Wala gin-islan ni Sister Pankova ang iya apelyido sang ginkasal sila.

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE