MARSO 19, 2024 | GIN-UPDATE: ABRIL 23, 2024
RUSSIA

UPDATE—GINSENTENSIAHAN NGA GUILTY ANG MAG-ASAWA | ‘Si Jehova ang Nagapaumpaw sa Akon’

I-PLAY

Sang Abril 22, 2024, nagdesisyon ang Petropavlovsk-Kamchatskiy City Court of the Kamchatka Territory nga guilty si Brother Sergey Chechulin kag ang iya asawa nga si Sister Yelena Chechulina. Ginsentensiahan sila sang duha ka tuig nga suspended prison. Indi sila kinahanglan nga mapriso sa sini nga tion.

Impormasyon Parte sa Ila

Sergey Chechulin

Natawo: 1968 (Tymlat, Kamchatka Territory)

Biograpiya: Nagdaku sia sa isa ka orphanage. Nag-obra sia bilang manugkay-o sa isa ka heating company

Gin-agda sia nga mag-attend sa isa ka miting sang mga Saksi ni Jehova sang iya abyan nga naga-Bible study. Natun-an ni Sergey ang makapakumbinsi nga mga sabat sa iya mga pamangkot. Nabawtismuhan sia sang 1995

Napangasawa niya si Yelena sang 2000. May isa sila ka bata nga lalaki

Ang Iya Ginsiling

Ano nga teksto sa Biblia ang nakapalig-on gid sa imo kag sa imo asawa?

Ginbutangan sing restriksion ang amon pagbiyahe, ginkuha ang amon salakyan, kag indi namon magamit ang amon kuarta sa banko. Pero subong, mas naapresyar pa gid namon ang ginsiling sa Salmo 55:22: “Itugyan ang imo lulan kay Jehova, kag sia magaalay-ay sa imo. Indi gid sia magtugot nga mapukan ang isa nga matarong.” Nagpromisa si Jehova nga buligan niya kita nga mangin mabakod. Paagi sa iya bulig, ini nga mga sitwasyon wala gid nagpaluya sa amon. Natun-an namon nga magsalig pa gid kay Jehova kag sa amon mga kauturan. Mas determinado kami subong nga padayon sia nga simbahon sing bug-os.

Yelena Chechulina

Natawo: 1978 (Petropavlovsk-Kamchatskiy)

Biograpiya: Nag-obra sia bilang nars

Nagpa-Bible study ang nanay ni Yelena sa mga Saksi ni Jehova. Nakabulig ini nga marealisar ni Yelena nga kinahanglan man niya magtuon parte sa Dios kag nagpangabay sia sang Bible study. Nabawtismuhan sia sang 2000

Napamana niya si Sergey sang 2000

Ang Iya Ginsiling

Ano ang natun-an mo parte kay Jehova bangod sini nga eksperiensia?

Natalupangdan ko nga samtang nagabag-obag-o ang mga sitwasyon sa akon kabuhi, nagadugang pa gid ang akon paghangop sa Biblia. Halimbawa, sang naeksperiensiahan ko ini nga paghingabot, mas naapresyar ko pa gid ang ginsulat ni Pablo sa Roma 8:38, 39: “Kay kumbinsido ako nga bisan ang kamatayon ukon ang kabuhi ukon ang mga anghel ukon ang mga panguluhan ukon ang mga butang karon ukon ang mga butang nga maabot ukon ang mga kagamhanan ukon ang kataason ukon ang kadalumon ukon ang iban pa nga tinuga indi makapugong nga mabaton naton ang gugma sang Dios nga ginapakita man ni Cristo Jesus nga aton Ginuo.” Kon gusto ni Jehova nga ipakita nga palangga niya ako, wala gid sing makapugong sa iya. Kag ginahimo niya ini sa paagi nga indi ako magduhaduha nga Sia ang nagapaumpaw sa akon. Wala gid nagahipos si Jehova ukon nagatago sang iya gugma para sa iya mga alagad. Kabalo ko nga ini nga mga eksperiensia makabulig sa akon nga makabatas sang bisan ano man nga pagtilaw nga maatubang ko.

Pareho kay Sergey kag Yelena, ginapabaloran man naton ang perpekto nga regalo sang Pulong sang Dios samtang ginahatagan niya kita sang kusog kag kaalam nga kinahanglan naton para makapabilin nga matutom bisan pa may kabudlayan.—Salmo 19:7.

Time Line

Septiembre 25, 2022

Ginsugdan ang kaso
Oktubre 17, 2022

Gin-raid ang ila balay
Septiembre 6, 2023

Ginbutangan sing restriksion ang pagbiyahe ni Sergey
Septiembre 7, 2023

Ginbutangan sing restriksion ang pagbiyahe ni Yelena
Disiembre 26, 2023

Ginsugdan ang hearing

Tan-awa Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE