DISIEMBRE 8, 2022 | GIN-UPDATE: DISIEMBRE 23, 2022
RUSSIA

UPDATE—GINSENTENSIAHAN | Nakita Gid Nila ang Bulig ni Jehova

I-PLAY

Ginsentensiahan nga guilty sang Alatyrskiy District Court of the Chuvash Republic sanday Brother Andrey Martynov, Sister Nina Martynova kag Sister Zoya Pavlova, kag Brother Mikhail Yermakov. Sanday Nina kag Zoya pareho nga ginmultahan sang 350,000 ka ruble ($5,000 U.S.). Si Andrey kag si Mikhail pareho nga ginsentensiahan sang anom ka tuig nga suspended prison. Indi nila kinahanglan nga mapriso sa sini nga tion.

Impormasyon Parte sa Ila

Andrey Martynov

Natawo: 1964 (Barnaul, Altai Territory)

Biograpiya: Nag-obra sia bilang drayber

Nakasugod na si Andrey kag si Nina sa pagtuon sang Biblia antes pa sila nag-asawahay. Ginkasal sila kag nabawtismuhan sang 1992. May duha sila ka bata nga babayi

Ang Iya Ginsiling

Ano ang nakabulig para indi madula ang imo pagsalig kay Jehova?

Kon indi ako sigurado kon ano ang akon himuon, nagadulog ako kag ginadumdom nga si Jehova ang ulo sang daku kaayo nga pamilya. Grabe gid sia kaalam kag mas eksperiensiado sia sangsa akon. Kag pareho sa isa ka maayo nga amay, ginagiyahan niya ang mga miembro sang iya pamilya, pati ako. Nagapasalamat gid ako sa iya paggiya, kag gusto ko himuon ang akon pinakamasarangan para masunod ini. Nakita ko kon paano niya ako ginbuligan nga maatubang ang mga kabudlayan sa pisikal kag sa emosyon bangod sini nga imbestigasyon. Gani kumbinsido ako nga kontrolado ni Jehova ang tanan nga butang. Kag nagpabakod gid ini sang akon relasyon sa iya.

Zoya Pavlova

Natawo: 1965 (Ibresi, Chuvash Republic)

Biograpiya: Nailo sia sang duha pa lang ka tuig ang iya edad. Nag-obra sia sa mga housing kag community service agency antes sia mag-retire

Nagsugod sia sa pagtuon sa Biblia sang 2016. Nalipay gid sia sang natun-an niya ang gugma kag empatiya ni Jehova. Nabawtismuhan sia sang 2018

Ang Iya Ginsiling

Paano mo nabatyagan ang bulig ni Jehova sa sini nga tion?

Sang primero, nabudlayan gid ako labi na gid sa una nga mga interogasyon. Pero sa sina man nga tion nga nabatyagan ko ang bulig ni Jehova sa espesyal nga paagi. Kada adlaw, ginabuligan niya ako nga mangin kalmado kag padayon nga mangin malapit sa iya, pareho sa ginpromisa niya sa Isaias 41:10. Nagapasalamat man ako sa mag-asawa nga nagabulig sa akon subong. Pareho sa akon, ginaimbestigahan man sila kag may mga problema man, pero ginapaupod nila ako sa ila family worship kada semana. Kada magkadto ako sa ila, napalig-on gid ako. Bisan madamo pa ako sang atubangon nga mga problema sa palaabuton, kumbinsido ako nga makapadayon ako bangod kaupod ko si Jehova.

Pareho sang aton mga kauturan nga padayon nga nangin malig-on bisan ginahingabot, kita man puede mangin “maisog kaangay sang leon” kon may mga kabudlayan, kay bal-an naton nga palangga kita ni Jehova kag buligan niya kita.—Hulubaton 28:1.

Time Line

Hunyo 23, 2021

Gin-raid ang pila ka balay sa Alatyr
Oktubre 28, 2021

Gin-imbestigahan si Andrey kay nagaorganisar sia kuno sang mga hilikuton sang isa ka extremist nga organisasyon. Ginbutangan sing restriksion ang iya pagbiyahe
Abril 25, 2022

Ginkasuhan si Andrey. Gindugang sa mga ginkasuhan si Nina. Ang iya kaso pag-entra sa mga hilikuton sang isa ka extremist nga organisasyon
Abril 26, 2022

Gindugang man si Zoya sa mga ginkasuhan nga nagaentra sa hilikuton sang isa ka extremist nga organisasyon
Abril 28, 2022

Gindugang man si Mikhail sa mga ginkasuhan nga nagaorganisar sang hilikuton sang isa ka extremist nga organisasyon
Agosto 31, 2022

Ginsugdan ang hearing

Basi Manamian Ka Man

NEWS RELEASE

Ara sa Prisuhan Bangod sa Ila Pagtuo—Russia

Ang mga Saksi ni Jehova sa Russia ginapriso bangod sa ila pagtuo. Hibalua ang ila kasaysayan, kag puede ka man maka-print sang listahan sang tanan nga napriso nga Saksi.

NEWS RELEASE