Sang Disiembre 6, 2021, gin-deny sang Rostov Regional Court ang pag-apelar ni Arsen, ni Vilen, kag ni Aleksandr. Padayon sila nga prisuhon.

Sang Hulyo 29, 2021, ginsentensiahan sang Leninskiy District Court of Rostov-on-Don si Arsen kag si Aleksandr nga mapriso sing anom ka tuig kag tunga kag si Vilen nga mapriso sing anom ka tuig. Ining tatlo ka brother napriso na sing sobra duha ka tuig sa pretrial detention kag padayon sila nga prisuhon.

Arsen Avanesov

• Natawo: 1983 (Baku, Azerbaijan)

• Biograpiya: Nag-eskwela sia sing engineering kag nagtrabaho sa konstruksion. Sang bata sia, nanamian sia maghampang sing rugby. Nagtuon sia sing English kag French

  Ginbuligan sia sang iya mga ginikanan nga pabaloran ang Biblia. Nabawtismuhan sia bilang isa sa mga Saksi ni Jehova sang 2005

Vilen Avanesov

• Natawo: 1952 (Baku, Azerbaijan)

• Biograpiya: Nagatrabaho sia bilang elektrisyan kag panday sang balay. Nanamian sia magluto, maghimo sing tinapay, kag magbasa. Sang bata sia, ang Biblia amo ang isa sa paborito niya nga libro

  Napangasawa niya si Stella sang 1980. May bata sila nga lalaki nga si Arsen, kag bata nga babayi nga si Elina. Nagpalagyo ang ila pamilya bilang mga refugee sa Armenia sang 1988. Sa sina man nga tuig gin-igo sang mabaskog nga linog ang Yerevan, sa Armenia, kag namigado ang mga tawo sa sini nga lugar. Bangod sini, nagsaylo naman ang ila pamilya. Nagsaylo sila sa Rostov-on-Don, sa Russia. Nabawtismuhan sia sang 2006

Aleksandr Parkov

• Natawo: 1967 (Spassk, Kemerovo Region)

• Biograpiya: Bata pa lang sia, nagaobra na sia sa ila uma kag nagasagod sang mga sapat. Nagaobra sia bilang tractor operator kag isa sia ka artistic coppersmith

  Napangasawa niya si Galina sang 1990. Magkaupod sila nga nagtuon sang Biblia. Nabawtismuhan sia sang 1992. May tatlo sila ka bata nga babayi kag duha ka apo

Sang Mayo 22, 2019, sunodsunod nga gin-raid sang mga awtoridad ang mga balay sang mga Saksi ni Jehova sa Rostov-on-Don. Gin-aresto nila si Brother Vilen Avanesov kag ang iya bata nga si Arsen, pati man si Brother Aleksandr Parkov. Ginbutang sila sa pretrial detention sing halos duha ka tuig. Sang Marso 2021, ginsaylo sila nga tatlo sa isa ka detention facility.

Ang asawa ni Vilen nga si Stella, gindumilian nga bisitahan ang iya bana kag bata nga lalaki. Wala man sia palangitan-an. Ang asawa ni Aleksandr nga si Galina, ginkasuhan man bangod sa iya pagtuo. Ginsentensiahan sia sang korte sing duha ka tuig kag tatlo ka bulan nga suspended prison sentence.

Nasubuan gid ang aton mga kauturan sa bilog nga kalibutan sa pag-aresto sa ila. Indi gid ini makatarunganon. Kabay pa nga padayon naton nga dumdumon “ang mga yara sa bilangguan, nga daw subong nga nabilanggo man [kita] upod sa ila.”—Hebreo 13:3.