Sang Hunyo 6, 2019, duha ka semana pagkatapos ginbasura ang apelar ni Brother Dennis Christensen, ginsaylo sia sang mga awtoridad sang Russia halin sa ginprisuhan sa iya sa Oryol pakadto sa isa pa ka prisuhan—sa Penal Colony No. 3 sa siudad sang Lgov. Ang Lgov mga 200 ka kilometro ang kalayuon halin sa Oryol diin nagaistar ang pamilya kag mga abyan ni Dennis.

Pag-abot ni Dennis sa prisuhan, gin-insulto sia sang mga tawo kag gintinguhaan nila nga gub-on ang iya integridad. Pero, nagasalig gid si Dennis kay Jehova amo nga mabakod sia gihapon kag wala nahadlukan.—1 Pedro 5:10.

Halin sang gin-aresto kag ginpriso si Dennis, mahigugmaon nga ginasuportahan kag ginaatipan sang kauturan ang iya asawa nga si Irina. Sang Hunyo, nakigkita kay Irina sa Finland si Brother Mark Sanderson sang Nagadumala nga Hubon, upod ang pila ka responsable nga mga brother para palig-unon sia.

Sobra na isa ka bulan nga napriso si Dennis sa penal colony. Sining karon lang, ginpasugtan si Irina nga maistorya sia paagi sa telepono, isa ka bes kada adlaw. Ginpasugtan man sia nga bisitahon si Dennis sa prisuhan.

Bisan pa sang tanan nga ginbatas ni Dennis kag ni Irina sa nagligad nga duha ka tuig halin sang gin-aresto kag ginpriso si Dennis, nagapabilin sila gihapon nga malig-on kag malipayon. Nagsiling si Irina nga napabakod gid sia sa mga sulat sa iya ni Dennis. Ang isa sa iya paborito nga sulat halin kay Dennis nagasiling: “Ang pagpabilin nga positibo amo ang makabulig sa aton nga mangin madinalag-on kag madamo kita sing rason para mangin malipayon.” Naghinakop sia: “Ang pagsakdag sa pagkasoberano ni Jehova amo ang rason kon ngaa nagaluntad kita. Kabalo ko nga malawig pa ang aton lakbayon kag wala kita nagdaug—wala pa. Pero magadaug gid kita sa ulihi. Siento porsiento ako nga sigurado.”

Sang Hulyo 21, sa internasyonal nga kombension sa Denmark, ginbasa ni Brother Lett sang Nagadumala nga Hubon ang mensahe halin kay Dennis, nagasiling ini: “Ginahandum ko nga makaupod ko kamo, pero indi ini posible subong kay wala ko pa matapos ang akon asaynment. Pero makaupod ko gid kamo sa palaabuton, kag excited na gid ako sa sina nga tion.”

Sang ginpriso si Pablo sa Roma, nagsulat sia: “Nagapasalamat ako pirme sa Dios sa tion nga madumduman ko kamo sa akon tagsa ka pag-ampo. Nagaampo ako pirme sing malipayon, . . . Yari kamo sa akon tagipusuon, kamo tanan mga umalambit upod sa akon sa wala tupong nga kaayo, sa akon mga gapos sang pagkabilanggo, kag sa pagpangapin kag legal nga pagpamatuod sa maayong balita.”—Filipos 1:3, 4, 7.