Sang Agosto 23, 2021, gin-deny sang Perm Territory Court ang pag-apelar nanday Boris, Aleksandr, Viktor, Igor, kag Yuriy. Ipatuman gihapon ang sentensia anay sa ila.

Sang Mayo 12, 2021, ginpahibalo sang Industrial District Court of the City of Perm ang desisyon sini sa kaso nanday Boris, Aleksandr, Viktor, Igor, kag Yuriy. Si Igor ginsentensiahan sing pito ka tuig nga suspended prison sentence. Samtang duha ka tuig kag tunga naman nga suspended prison sentence para sa apat pa ka brother.

Boris Burylov

• Natawo: 1941 (Sevastopol)

• Biograpiya: Nagdaku sa Perm Territory. May degree sa agronomy. Sang bata sia, ginabasahan sia sang iya iloy sing Biblia. Sang dekada ’90, nakatigayon sia sang kompleto nga Biblia. Nabawtismuhan sia bilang isa sa mga Saksi ni Jehova sang 1996

Aleksandr Inozemtsev

• Natawo: 1972 (Kostanay)

• Biograpiya: Nangin soldado sia. Nagtrabaho man sia bilang elektrisyan, mekaniko, kag subong ang iya trabaho amo ang pagmentinar kag pagkay-o sang mga apartment. Ginapaligban niya kon ngaa nagaantos sing inhustisya ang mga tawo kag nagakapatay. Nasabat ini sang ginbasa niya ang Biblia kag sang nag-Bible study sia sa mga Saksi ni Jehova. Nabawtismuhan sia sang 1996. Napangasawa niya si Olesya sang 2017. Magkaupod nila nga ginapadaku ang bata nga babayi ni Olesya. Nanamian sia magdrowing, maghampang sing hockey, kag mangisda

Viktor Kuchkov

• Natawo: 1967 (Svetlitsa)

• Biograpiya: Halin sang bata pa sia mahilig na sia maghimo sing mga wood carving. Nakatuon man sia nga mangin metal processing engineer kag nagtrabaho bilang isa ka design engineer. Nanamian sia mangisda kag maghampang sing volleyball. Napangasawa niya si Tanya sang 1988. May isa sila ka bata nga babayi. Interesado gid sia magtuon parte sa Dios. Nabawtismuhan sia bilang isa sa mga Saksi ni Jehova sang 1993

Igor Turik

• Natawo: 1968 (Nelidovo)

• Biograpiya: Nagatrabaho sia bilang isa ka photographer kag architectural designer. Sang dekada ’90, nagtuon sia sing Biblia upod sa mga Saksi ni Jehova. Nagdayaw gid sia sa pagsantuanay sang mga libro sa Biblia. Nabawtismuhan sia sang 1998. Nakapangasawa sia sang 2002 kag may duha sia ka bata, isa ka lalaki kag isa ka babayi. Mahilig sia sa photography, videography, kag radio electronics

Yuriy Vaag

• Natawo: 1975 (Lesosibirsk)

• Biograpiya: Nakatuon sia mag-operate sang crane. Subong, isa sia ka elektrisyan kag nagatrabaho sa pagmentinar sang mga bilding. Sang soldado pa sia, ginsugiran sia sang iya utod nga babayi parte sa Biblia. Nakita niya nga maayo gid ang epekto sang mga panudlo sang Biblia sa iya utod nga babayi, gani nagtuon man sia sing Biblia. Nabawtismuhan sia sang 1996. Napangasawa niya si Svetlana sang 1996. May duha sila ka bata, isa ka lalaki kag isa ka babayi

Sang Septiembre 17, 2018, gin-raid sang Federal Security Service (FSB) kag sang iban pa nga special troop ang madamo nga balay sa Perm Territory. Indi magnubo sa pulo ka balay sang mga kauturan ang ginhalughog. Ginpanguha ang ila kuarta, cell phone, kag iban pa nga mga gadyet. Si Viktor kag si Igor, gin-detain sing pila ka adlaw kag dayon gin-house arrest sila sing halos apat ka bulan. Subong, may ginapatuman nga mga limitasyon kag mga kondisyon ang korte sa ila tanan. Ginbutang man ang ila mga ngalan sa listahan sang mga “extremist” sa Russia.

Ini nga mga brother padayon nga nangin maisog kag malipayon gihapon bisan sang mga kabudlayan nga ila naeksperiensiahan.

Si Yuriy nagsiling nga mas pirme na sia subong nagapangamuyo kay Jehova. Pirme man niya ginapamalandungan kon paano sia ginabuligan kag ginapabakod ni Jehova. Nagsiling sia: “Ang ginsiling sang Josue 1:7 nakabulig gid sa akon nga mangin kalmado. May ginsiling ini nga teksto nga dapat ko sundon. Nabatyagan ko gid nga ginabuligan ako ni Jehova kag ginaatipan niya ako.”

Si Viktor nagsiling nga nakabulig sa iya nga mangin kalmado ang pagpamalandong sa ginahimo sang organisasyon ni Jehova. Nagsiling sia: “Ginaimadyin ko kon daw ano ka gamhanan si Jehova, ang makita kag indi makita nga bahin sang iya organisasyon, ang aton dalayawon nga paghiliutod, ang pagbantala nga ginahimo sa bilog nga kalibutan, kag ang matahom kag mapatihan nga mga kamatuoran. Nakabulig ini sa akon nga indi lang pirme pagpamensaron ang akon kaugalingon. Kon himuon ko ini, nagakalma ako dayon.”

Pagpuli ni Igor sa ila balay, naham-ot sia kon madumduman niya ang pila niya ka eksperiensia. Nagsiling sia: “Sang ara ako sa detention facility, may gindrowing nga piktyur sang bag-ong kalibutan ang akon bata nga babayi kay gusto niya ako palig-unon. Pero wala nagsugot ang mga pulis nga ihatag ini sa akon. Nagsiling ang akon asawa nga madugay nga ginhimutaran sang pulis sa prisuhan ang piktyur kag dayon ginbalik ini sa iya. Nagsiling sia: ‘Indi na ’di puede kay daw plano ina kon paano sia makapalagyo.’” Nagsiling si Igor: “Insakto sila, kay sa sining malain nga kalibutan gusto gid man naton malagyo pakadto sa bag-ong kalibutan!”

Nagasalig kita nga padayon nga gamiton ni Jehova ang iya balaan nga espiritu para buligan ang aton mga kauturan kag ang ila mga pamilya. Kabalo kita nga pabakuron gid sila ni Jehova para makabatas sila.—Efeso 3:20.