Sang Septiembre 23, 2021, ang Volgograd Traktorozavodsky District Court nagdesisyon nga guilty ang tatlo ka brother. Si Brother Yegozaryan kag si Brother Melnik ginsentensiahan nga mapriso sing anom ka tuig. Si Brother Rogozin ginsentensiahan nga mapriso sing anom ka tuig kag lima ka bulan.

Sergey Melnik

• Natawo: 1972 (Volgograd, Volgograd Region)

• Biograpiya: Naggradweyt sia sa isa ka vocational technical school bilang isa ka mekaniko. Nagatrabaho sia subong bilang isa ka manug-atop. Napangasawa niya si Anna sang 1993. May tatlo sila ka bata nga lalaki. Nanamian sila nga pamilya mag-hiking kag maglagawlagaw para ma-enjoy ang palibot

  Nagtuon si Anna sing Biblia upod sa mga Saksi ni Jehova. Sang nakita ni Sergey ang maayo nga resulta sang pagtuon ni Anna, nagtuon man sia sing Biblia. Nabawtismuhan sia sang 1999

Valeriy Rogozin

• Natawo: 1962 (Krasnokamsk, Perm Region)

• Biograpiya: Nagtrabaho sia bilang military pilot sa sulod sang 12 ka tuig antes sia nagretiro kag nagtrabaho bilang design engineer. Napangasawa niya si Marina sang 1984. May duha sila ka bata nga lalaki

  Nagtuon sia sing Biblia sang mga dekada ’90. Nabawtismuhan sia sang 1998

Igor Yegozaryan

• Natawo: 1965 (Volgograd, Volgograd Region)

• Biograpiya: Sapatero sia kag isa ka elektrisyan. Halin sang bata pa sia nanamian na sia sa music. Mahilig sia maggitara. Napangasawa niya si Yevgeniya sang 2002. May isa sila ka bata nga lalaki

  Natun-an niya ang maayong balita sang Ginharian sang Dios sa iya nanay. Nagdayaw gid sia sa simple pero mapatihan nga kamatuoran sa Biblia. Nabawtismuhan sia sang 1992

Sang Mayo 16, 2019, gin-raid sang mga pulis kag sang mga agent sang Federal Security Service (FSB) ang pito ka balay sa Volgograd Region sa Russia. Pagligad sang duha ka adlaw, ang judge sang central district court nagmando nga ibutang sa pretrial detention sanday Brother Melnik, Brother Rogozin, kag Brother Yegozaryan. Nagtener sila diri nga tatlo sing pito ka bulan.

Bisan pa ginpagua na ang tatlo ka brother kag nakaupod na nila ang ila mga pamilya, mabudlay gihapon ang ila kabuhi samtang nagahulat sila sang desisyon sang korte parte sa ila kaso. Halimbawa, ang ngalan ni Valeriy ginbutang sa listahan sang Federal Financial Monitoring Service of the Russian Federation. “Indi ko matandog ang akon kuarta sa banko kay gin-freeze ini sang mga awtoridad,” siling ni Valeriy, “kag indi ako makagamit sang telepono kag Internet. Wala naman ako sing trabaho kay kinahanglan ko maggamit sing telepono kag Internet sa akon obra.” Subong, nagasalig lang sila nga mag-asawa sa ila pension para mabuhi. Gani, ginpasimple gid nila ang ila kabuhi.

May mga pagdumili man nga ginpatuman kay Sergey kag kay Igor. Bangod sini, mabudlay gid sa ila nga makakita sing obra. Nabudlayan si Sergey makakita sang regular nga obra kay pirme lang sia ginapatawag sang korte. Nagsiling sia: “Manug-atop ako, gani ginabaton ko lang ang obra nga matapos ko dayon sa mga inadlaw nga wala sing hearing.”

May balatian si Igor gani kinahanglan niya pirme magpaospital. Nagsiling sia: “Bangod sa mga kaso nga ginpasaka sa akon, nabudlayan ako makakita sing obra.” Pero, bisan pa may balatian sia kag nagapamigado sila, nagsiling sia: “Ginhatagan kami ni Jehova sang isa ka daku nga pamilya, ang amon mga kauturan, nga wala gid nagbiya sa amon sa sining mabudlay nga sitwasyon sa amon kabuhi.”

Bangod sa mga pagdumili nga ginpatuman sa ila, nabudlayan gid ang aton mga kauturan nga suportahan ang ila kaugalingon kag ang mga kinahanglanon sang ila pamilya. Nagasalig kita nga padayon nga mangin malig-on ang aton mga kauturan sa Russia sa mga pagtilaw nga ila naeksperiensiahan. Kabalo kita nga padayon sila nga hatagan ni Jehova sang tanan nila nga kinahanglanon.—Mateo 6:33.