Sang Pebrero 3, 2022, ang Ussuriyskiy District Court of the Primorye Territory nagdesisyon nga guilty si Sergey. Ginsentensiahan sia sing tatlo ka tuig nga suspended prison.

Sergey Melnikov

• Natawo: 1973 (Terney, Primorye Territory)

• Biograpiya: Nag-obra sia bilang panday, bombero, mangingisda, kag dyanitor. Nanamian sia maghampang sing hockey kag volleyball sang pamatan-on sia. Nagtuon sia sang Biblia upod sa mga Saksi ni Jehova sang mga tuig 2000. Nagsaylo sia sa Ussuriysk sang 2003 kag nabawtismuhan sina man nga tuig

Ginkasuhan si Brother Sergey Melnikov sang Hunyo 2019. Gindakop sia sang mga awtoridad samtang nagapakighambal sia sa isa ka interesado parte sa Biblia. Gin-raid man sang mga awtoridad ang iya puluy-an kag ginkuha ang iya laptop kag cell phone.

Apat ka bulan nga ara si Sergey sa pretrial detention kag 145 ka adlaw sia nga naka-house arrest. Kon kaisa nagabatyag si Sergey nga wala na sia sing kusog para makabatas. Kon amo sini ang iya ginabatyag, ginadumdom niya ang ginasiling sang 1 Corinto 10:13 kag nagapagsik sia liwat. “Nahangpan ko nga kon ginatugot ni Jehova ini nga mga pagtilaw, mabatas ko ini,” siling niya. “Ginahatagan ako ni Jehova sing ‘gahom nga labaw sa kinaandan.’”—2 Corinto 4:7.

Sang Pebrero 25, 2020, natapos na ang pag-house arrest sa iya. Pero ginbutangan sang mga awtoridad sing restriksion ang iya pagbiyahe.

Samtang ginahulat naton ang desisyon sang korte, makasalig kita nga si Jehova padayon nga mangin ‘bulig kag taming’ para kay Sergey kag sa tanan nga kauturan sa Russia.—Salmo 115:11.