Sa Oktubre 21, 2020, * ipahibalo sang Pervomayskiy District Court sa siudad sang Omsk ang desisyon sini sa kaso ni Brother Sergey Polyakov kag sang iya asawa nga si Anastasia, upod sa duha pa nga sanday Sister Gaukhar Bektemirova kag Sister Dinara Dyusekeyeva. Gusto sang piskal nga sentensiahan si Brother Polyakov sing anom ka tuig kag tunga nga pagkapriso. Ang tatlo ka sister mahimo pamatbatan sing tag-duha ka tuig nga suspended prison sentence.

Sergey Polyakov

• Natawo: 1972 (Murmansk Region)

• Biograpiya: Nakatapos sang kolehiyo kag nangin radiophysicist. Ginpangasawa niya si Anastasia sang 2003

Anastasia Polyakova

• Natawo: 1984 (Murmansk Region)

• Biograpiya: Nagtuon sia sing law sa kolehiyo. Nanamian sila ni Sergey magtuon sing mga lenguahe pareho sang Chinese, Kazakh, Russian Sign Language, kag Serbian

Gaukhar Bektemirova

• Natawo: 1976 (Uryl, Kazakhstan)

• Biograpiya: Kamanghuran sa anom ka kabataan. Nagdaku sia sa kabukiran sang Kazakhstan kag nanamian gid sa mga tinuga sa palibot. Madugay niya nga ginpangita kon ano gid ang kahulugan sang kabuhi. Sang ulihi, nakita niya ang makatarunganon kag makapaumpaw nga sabat sa Biblia. Ang iya maid-id nga pagtuon sa Pulong sang Dios naghatag sa iya sing kusog kag paumpaw sa sining tion sang ilegal nga pagpriso sa iya

Dinara Dyusekeyeva

• Natawo: 1982 (Leningradskoye, Kazakhstan)

• Biograpiya: Sang bata pa sia, pirme niya ginpamensar kon ano gid ang kahulugan sang kabuhi. Nagtuon sia sa Biblia sang 17 anyos sia. Nalipay gid sia sa iya natun-an sa Biblia kag sang nakilala niya ang ngalan sang Awtor sini, si Jehova. Nanamian sia mag-basketball, mag-volleyball, magdalagan, kag mag-bike

Sang gab-i sang Hulyo 4, 2018, nagakatulog na si Brother Polyakov kag ang iya asawa nga si Anastasia, sang ginsulod sang mga pulis ang ila apartment paagi sa pagguba sang puertahan sini. Ginkastigo sining mga pulis nga may tabon ang guya si Brother Polyakov. Gin-aresto sila nga mag-asawa kag ginbutang sa pretrial detention center. Sila ang una nga mag-asawa nga ginpriso pagkatapos sang desisyon sang Supreme Court sang 2017 nga nagdumili sang hilikuton sang mga Saksi ni Jehova. Lima ka bulan sila nga ginbartolina nga indi upod ang isa kag isa, dayon gin-house arrest sila.

Sang Mayo 2019, ilegal naman nga nagpang-raid ang mga awtoridad sa balay sang mga Saksi ni Jehova sa Omsk Region. Pagkatapos sini, gin-aresto si Sister Bektemirova kag si Sister Dyusekeyeva. Ang ila kaso gindugang sa kaso kriminal sang mag-asawa nga Polyakov. Ang dungan nga pagbista sa ila kaso ginsugdan sang Abril 1, 2020.

Nagasalig kita nga hatagan ni Jehova ang iya mga alagad sing kusog nga kinahanglan nila para mabatas ini nga mga inhustisya.—Efeso 3:20.