Sa pagsugod subong sang hearing sang Russian Federation Supreme Court, naghatag sing argumento ang Ministry of Justice nga dapat gid dumilian ang tanan nga legal nga korporasyon sang mga Saksi ni Jehova kay suno sa desisyon sang lower court, batok sa gobierno ang ginahimo sang pila sa sini. Dayon ginpamangkot sang hukom ang representante sang Ministry of Justice kon bala ang ginhimo sang 8 ka korporasyon nga ila ginakuestyon, bastante nga basihan para kasuhan nila ang Administrative Center kag ang tanan nga 395 ka korporasyon sa Russia. Ginpamangkot man sang hukom kon ano ang mangin epekto sa pagsimba sang mga Saksi kon ipasira ang tanan nga korporasyon, kag pila ka beses niya ginpamangkot kon ngaa masiling nga ang mga Saksi nagapanggamo kag makatalagam sa publiko. Nagpautwas man sing mga pamangkot ang mga abogado sang akusado para ibuyagyag nga ang tuyo sang Ministry of Justice indi lang para ipasira ang ila legal nga mga korporasyon kundi dumilian gid ang relihion sang mga Saksi ni Jehova.

Padayunon ang hearing sa Abril 7, 2017, sa alas 10 sang aga.