Nagpadayon sa ikatlo nga adlaw ang hearing sang Russian Federation Supreme Court sa kaso nga pagdumili sa mga Saksi ni Jehova sa Russia. Lakip sa mga nagtestigo amo ang duha ka direktor sang Administrative Center nga nagpresentar sang ila pagpamatok sa kaso nga ginpasaka sang Ministry of Justice batok sa mga Saksi ni Jehova.

Si Sergey Cherepanov nagpamatok sa sugo sang Ministry nga untaton sang Administrative Center ang pagsupak sini sa kasuguan parte pagpamatok sa gobierno. Pero wala gid mapaathag sang Ministry kon paano ginasupak sang Administrative Center ang kasuguan ukon kon paano sini untaton ang pagsupak. Ang isa pa ka direktor nga si Vasiliy Kalin nagsiling man nga ang Administrative Center nagapanghikot sa sulod na sang 26 ka tuig. Namangkot sia: “Sang san-o kami nangin batok sa gobierno?” Nagsiling pa sia nga ang mga Saksi ni Jehova wala gid nagabag-o, kag pirme sila nagatuman sa mga awtoridad kag nagasunod sa mga prinsipio parte sa pagpakighidait. Ginpabutyag man niya ang iya kasubo kay nagsugod na ang paghingabot sa mga Saksi.

Magapadayon ang hearing sa Abril 12, 2017, sa alas 10 sang aga.