NEW YORK—May posibilidad nga dumilian ang pagsimba sang mga Saksi ni Jehova sa Russia. Gani nag-organisar sila sing kampanya sa bilog nga kalibutan nga maghimo sing sulat para mag-apelar sa Kremlin kag sa mga opisyal sang Supreme Court. Ginapangabay sang Nagadumala nga Hubon sang mga Saksi ni Jehova ang sobra 8,000,000 ka Saksi sa bilog nga kalibutan nga magpakigbahin sa sini nga kampanya.

Sang Marso 15, 2017, ang Russia’s Ministry of Justice nagpasaka sing kaso sa Supreme Court of the Russian Federation para ideklarar nga batok sa gobierno ang Administrative Center sang mga Saksi ni Jehova sa Russia kag ipasira ini. Lakip sa kaso ang pagdumili sa mga hilikuton sang Administrative Center. Kon ang Supreme Court magdesisyon pabor sa sini, ang headquarters sang mga Saksi malapit sa St. Petersburg ipasira. Dugang pa, ang mga 400 ka narehistro nga Local Religious Organization ipasira man, kag ang mga hilikuton sang sobra 2,300 ka kongregasyon sang mga Saksi ni Jehova sa Russia mangin ilegal na. Ang propiedad sang sanga, lakip ang mga lugar nga ginatipunan para sa pagsimba sang mga Saksi sa bilog nga pungsod, kuhaon na sang Estado. Mahimo man kasuhan ang bisan sin-o nga Saksi ni Jehova nga nagahimo sang ila hilikuton sa pagsimba. Sa Abril 5 ang Supreme Court magapapanaug sang desisyon sa sini nga kaso.

“Gusto gid sang Nagadumala nga Hubon sang mga Saksi ni Jehova nga hatagan sing pinasahi nga igtalupangod ining serioso nga sitwasyon,” siling ni David A. Semonian, humalambal sang world headquarters sang mga Saksi. “Ang pag-akusar sa mahidaiton, matinumanon sa kasuguan nga mga pumuluyo kag pagkabig sa ila nga daw mga terorista, nagapakita lang nga sala ang pagpatuman sa kasuguan nga ginapadapat sa mga tawo nga batok sa gobierno. Ini nga akusasyon nabase sa sayop nga mga panumbungon.”

Indi ini ang una nga tion nga naghimo ang mga Saksi sang bilog kalibutan nga kampanya. Mga 20 ka tuig na ang nagligad, ang mga Saksi nagsulat man para pangapinan ang ila mga kauturan sa Russia bilang sabat sa pagpakalain sang pila ka opisyal sang gobierno sa sina nga tion. Naghimo man sadto ang mga Saksi sing sulat para mangabay sa mga opisyal sang gobierno nga untaton ang paghingabot sa mga Saksi sa iban nga pungsod, lakip sa Jordan, Korea, kag Malawi.

“Ang pagbasa sing Biblia, pagkanta, kag pagpangamuyo upod sa mga masigkasumilimba indi gid batok sa gobierno,” siling pa ni Mr. Semonian. “Nagalaum kami nga paagi sa amon bilog kalibutan nga pagsulat mapahulag ang mga opisyal sa Russia nga untaton ining indi makatarunganon nga akusasyon batok sa amon mga kauturan.”

Media Contacts:

International: David A. Semonian, Office of Public Information, +1-845-524-3000

Russia: Yaroslav Sivulskiy, +7-812-702-2691