Ang Ministry of Justice sang Russia (Ministry) nagpasaka sing kaso sa Supreme Court, “para ideklarar ang relihioso nga organisasyon, ang Administrative Center sang mga Saksi ni Jehova nga batok sa gobierno, dumilian ang ila hilikuton, kag ipasira ini.” Sang Marso 15, 2017, ang Supreme Court nag-post sang notice sa ila opisyal nga website nga nabaton nila ang kaso halin sa Ministry. Ulihi na lang ginpadal-an sang notice ang Administrative Center nga binagbinagon sang Supreme Court ini nga kaso, kag gin-iskedyul ang hearing sa Abril 5, 2017 sa alas dies sang aga.

Kon magdesisyon ang Supreme Court pabor sa ginpasaka nga kaso sang Ministry, may malain gid ini nga epekto sa mga Saksi ni Jehova sa Russia. Kuhaon sa mga Saksi ang ila mga propiedad nga ginagamit para sa pagsimba, madula ang halos 400 ka legal nga korporasyon, kag mahimo kasuhan ang kada isa sa 170,000 ka Saksi bangod lang sa ila pagtipon para magsimba, pagbasa sing Biblia, ukon pagsugid sa iban parte sa ila pagtuo.

Si Vasiliy Kalin, representante sang Administrative Center sa Russia, nagsiling: “Ang gusto lang gid sang kada isa sang mga Saksi ni Jehova sa Russia nga masimba nila ang Dios sing malinong. Sa sulod na sang sobra 100 ka tuig, ginalapas sang awtoridad sang Russia ang ila kaugalingon nga kasuguan, nga nagahatag sa amon sini nga kinamatarong. Bata pa ako sang gintapok ni Stalin ang amon pamilya sa Siberia bangod lang mga Saksi ni Jehova kami. Nasubuan gid ako kag daw indi makapati nga posible man ini maeksperiensiahan sang akon kabataan kag mga apo. Wala gid ako maglaum nga sa moderno nga Russia hingabuton kami liwat bangod sa amon relihion.”